સિટી ન્યુઝ @ સ્પોર્ટ્સ 

2026 ફિફા વર્લ્ડ કપમાં કેનેડાએ કતાર સામે 6-0 થી ઐતિહાસિક વિજય મેળવ્યો છે. જોકે આ ભવ્ય જીતની ઉજવણી વચ્ચે કેનેડાની ટીમને એક બહુ મોટો ઝટકો લાગ્યો છે. ટીમના સ્ટાર ખેલાડી ઇસ્માઇલ કોનને મેચ દરમિયાન અત્યંત ગંભીર ઈજા પહોંચતા તેને ટુર્નામેન્ટમાંથી બહાર થવાનો વારો આવ્યો છે. મેચના બીજા ભાગમાં કતારના મિડફિલ્ડર આસિમ માદિબોએ કોનને રોકવાનો અત્યંત આક્રમક પ્રયાસ કર્યો હતો, જેમાં થયેલી જોરદાર ટક્કર બાદ કોન મેદાન પર જ પીડાથી ઢળી પડ્યો હતો અને તેને તાત્કાલિક સ્ટ્રેચર પર બહાર લઈ જવો પડ્યો હતો.

મેડિકલ ટીમના પ્રારંભિક અહેવાલો મુજબ આ ખતરનાક ટક્કરમાં ઇસ્માઇલ કોનના પગના બંને હાડકાં ખરાબ રીતે તૂટી ગયા છે. આટલી ગંભીર ઈજાના કારણે તેને હવે તાત્કાલિક સર્જરી કરાવવી પડશે. જ્યારે કોનને સ્ટ્રેચર પર મેદાનની બહાર લઈ જવામાં આવી રહ્યો હતો, ત્યારે સ્ટેડિયમમાં હાજર હજારો ચાહકોએ ઉભા થઈને તેને સન્માન આપ્યું હતું. કોને પણ દર્દ વચ્ચે હાથ લહેરાવીને આભાર માન્યો હતો. તેની જગ્યાએ મેદાનમાં આવેલા નાથન સલીબાએ થોડીવારમાં જ શાનદાર ફ્રી-કિકથી ગોલ ફટકાર્યો હતો અને કોનની 8 નંબરની જર્સી લહેરાવીને પોતાનો ગોલ ઈજાગ્રસ્ત સાથી ખેલાડીને સમર્પિત કર્યો હતો.

મેચ પૂરી થયા બાદ મેદાનનું વાતાવરણ અચાનક અત્યંત તંગ બની ગયું હતું. કેનેડાના કોચ જેસી માર્શ જ્યારે કતારના કોચ જુલેન લોપેટેગુઈ સાથે ઔપચારિક રીતે હાથ મિલાવવા ગયા, ત્યારે બંને વચ્ચે કોઈ બાબતે ઉગ્ર દલીલ શરૂ થઈ ગઈ હતી. જોતજોતામાં જ બંને દેશના ખેલાડીઓ અને સપોર્ટ સ્ટાફ પણ આ વિવાદમાં કૂદી પડ્યા હતા અને મેદાન પર જ ભારે ધક્કામુક્કી શરૂ થઈ ગઈ હતી. મામલો વધુ બિચકતો જોઈને સુરક્ષા કર્મચારીઓએ તાત્કાલિક દરમિયાનગીરી કરીને બંને ટીમોને અલગ કરી હતી અને સમગ્ર ઘટનાનો વીડિયો સોશિયલ મીડિયા પર વાયરલ થઈ રહ્યો છે.

ફૂટબોલમાં આક્રમક રમત અને ખેલદિલીનો સરેઆમ અભાવ આંતરરાષ્ટ્રીય સ્તરની મેચોમાં ખેલાડીઓની સુરક્ષા હંમેશા ચર્ચાનો વિષય રહી છે. જીતવાના દબાણ હેઠળ ખેલાડીઓ વારંવાર અત્યંત આક્રમક ટેકલનો સહારો લે છે, જે કોઈના કરિયર માટે ઘાતક સાબિત થઈ શકે છે. મેચ પૂરી થયા પછી બંને ટીમના કોચ અને ખેલાડીઓ વચ્ચે થતી બબાલ રમતગમતની ભાવનાને શર્મસાર કરે છે. ફિફા જેવા આયોજકોએ આવી ગેરશિસ્ત અને ખતરનાક રમત સામે કડક પગલાં લેવા જોઈએ જેથી રમતની ગરિમા જળવાઈ રહે.