• નિયમભંગ બદલ ૧.૨૦ લાખથી વધુનો દંડ વસૂલ્યો, વિદ્યાર્થીઓની સુરક્ષા માટે સતત બીજા દિવસે ડ્રાઈવ
• ભાવનગરમાં સ્કૂલ વાન અને બસ સામે સઘન ચેકિંગ, અનેક વાહનચાલકોમાં ફફડાટ
• પરમિટ, વીમો અને ફિટનેસ સર્ટિફિકેટના અભાવે વાહન માલિકો દંડાયા

સિટી ન્યુઝ @ ભાવનગર

નવા શૈક્ષણિક સત્રના પ્રારંભ સાથે જ વિદ્યાર્થીઓની સુરક્ષાને ધ્યાનમાં રાખીને ભાવનગર RTO વિભાગ દ્વારા સ્કૂલ અને કોલેજમાં વપરાતા વાહનો સામે સઘન ચેકિંગ ડ્રાઈવ શરૂ કરવામાં આવી છે. સતત બીજા દિવસે શહેરના સરદાર પટેલ સ્કૂલ અને હિલ પાર્ક ચોકડી રોડ જેવા વિસ્તારોમાં RTO ઇન્સ્પેક્ટર એમ.ટી. મકવાણાની ટીમ દ્વારા ઓચિંતી તપાસ કરવામાં આવી હતી. આ કાર્યવાહીમાં નિયમોનું ઉલ્લંઘન કરનારા ૨૨ જેટલા વાહનો સામે કેસ કરવામાં આવ્યા હતા અને અંદાજે રૂ. ૧.૨૦ લાખથી વધુનો દંડ સ્થળ પર જ વસૂલ કરવામાં આવ્યો હતો.

તપાસ દરમિયાન વાહનોમાં નિર્ધારિત ક્ષમતા કરતા વધુ વિદ્યાર્થીઓ બેસાડવા, પરમિટનો ભંગ, ડ્રાઇવિંગ લાયસન્સ, વીમો, પીયુસી અને ફિટનેસ સર્ટિફિકેટના અભાવ જેવી ગંભીર ખામીઓ જોવા મળી હતી. RTO ઇન્સ્પેક્ટર એમ.ટી. મકવાણાએ જણાવ્યું હતું કે, ખાસ કરીને જે વાહનો પાસે વિદ્યાર્થીઓ લાવવા-લઇ જવાની પરમિટ નથી તેમ છતાં ગેરકાયદે ફેરા મારતા હતા, તેમની સામે આકરી પેનલ્ટી ફટકારવામાં આવી છે. વિદ્યાર્થીઓની સુરક્ષા સુનિશ્ચિત કરવા માટે આ ડ્રાઈવ આગામી દિવસોમાં પણ શહેરના વિવિધ વિસ્તારોમાં નિયમિતપણે ચાલુ રહેશે.

આરટીઓ વિભાગ દ્વારા વાલીઓને પણ ખાસ અપીલ કરવામાં આવી છે કે તેઓ પોતાના બાળકોને શાળાએ મોકલતા પહેલા સ્કૂલ બસ, વાન કે રિક્ષાના તમામ દસ્તાવેજો જેવા કે વીમો, પરમિટ અને વાહનની યોગ્ય સ્થિતિ જાતે તપાસી લે. સુરક્ષાના માપદંડો પૂર્ણ હોય તો જ બાળકને પરિવહન માટે મોકલવા જોઈએ. RTO ની આ કડક કાર્યવાહીને પગલે સ્કૂલ સંચાલકો અને વાહન માલિકોમાં ફફડાટ વ્યાપી ગયો છે અને તેઓ પોતાના વાહનોના કાગળો અને સુરક્ષાના માપદંડો પૂર્ણ કરવા માટે સક્રિય બન્યા છે.

સુરક્ષા માટે વાલીઓ માટે સૂચના

વાલીઓએ સ્કૂલવાન કે બસ પસંદ કરતી વખતે વાહનની યાંત્રિક સ્થિતિ અને પરમિટ ખાસ તપાસવી જોઈએ. જો વાહનમાં ક્ષમતા કરતા વધુ વિદ્યાર્થીઓ હોય અથવા ડ્રાઇવર પાસે માન્ય લાઇસન્સ ન હોય, તો તે બાળકની સુરક્ષા માટે મોટું જોખમ છે. આરટીઓ વિભાગની આ ડ્રાઈવનો મુખ્ય હેતુ અકસ્માતો ઘટાડવાનો છે. વાલીઓએ કોઈપણ જોખમ લીધા વગર સંપૂર્ણ ખાતરી કર્યા બાદ જ બાળકને વાહનમાં બેસાડવા જોઈએ, જેથી સુરક્ષિત મુસાફરી સુનિશ્ચિત થઈ શકે.