સિટી ન્યુઝ @ જલપાઈગુડી

જલપાઈગુડી, પશ્ચિમ બંગાળના જલપાઈગુડી જિલ્લામાં ૩૫ વર્ષીય ચાના ખેડૂત દીપાંકર ગોપને શનિવારે બાંગ્લાદેશી બદમાશો દ્વારા બાંગ્લાદેશ લઈ જવાની એક અત્યંત ગંભીર ઘટના સામે આવી છે. આ ઘટના ભારત-બાંગ્લાદેશ સરહદ નજીક રાજગંજ બ્લોકના કુકુરજાન વિસ્તારના એક ચાના બગીચામાં બની હતી. પરિવારજનોના આરોપ મુજબ, આ અઠવાડિયે સરહદ પારથી ઘૂસણખોરીનો પ્રયાસ નિષ્ફળ ગયા બાદ તેનો બદલો લેવા માટે આ અપહરણ કરવામાં આવ્યું છે.

અંદાજે ૨૦ જેટલા બાંગ્લાદેશી બદમાશો આંતરરાષ્ટ્રીય સરહદ પાર કરીને ખેતરમાં પહોંચ્યા હતા અને દીપાંકરને બળજબરીપૂર્વક બાંગ્લાદેશના પંચગઢ જિલ્લામાં ખેંચી ગયા હતા. આ અપહરણ બાદ BSFના જવાનો તાત્કાલિક ઘટનાસ્થળે પહોંચી ગયા હતા અને દીપાંકરને મુક્ત કરાવવાના સઘન પ્રયાસો શરૂ કર્યા હતા. અધિકારીઓએ બોર્ડર ગાર્ડ બાંગ્લાદેશ (BGB) સાથે ફ્લેગ મીટિંગ પણ યોજી છે, પરંતુ શનિવાર રાત સુધી તેમને મુક્ત કરવામાં આવ્યા ન હતા.

આ દરમિયાન સોશિયલ મીડિયા પર દીપાંકરનો એક વીડિયો પણ વાયરલ થઈ રહ્યો છે, જેમાં તેઓ કહી રહ્યા છે કે ભારતીય અધિકારીઓ દ્વારા પકડાયેલા બાંગ્લાદેશી નાગરિકને છોડવામાં આવે તો જ તેમને મુક્ત કરવામાં આવશે. બીજી તરફ, બાંગ્લાદેશી મીડિયા દાવો કરી રહ્યું છે કે આ કાર્યવાહી BSF દ્વારા એક વૃદ્ધની ધરપકડના જવાબમાં કરવામાં આવી છે.

ઘટનાને પગલે સરહદી વિસ્તારોમાં સુરક્ષા એજન્સીઓ વધુ સતર્ક બની ગઈ છે અને ભારત-બાંગ્લાદેશ સરહદ પર સુરક્ષા તથા ફેન્સિંગના કાર્યોને વેગ આપવાની માંગ ઉઠી રહી છે.

સરહદી સુરક્ષા અને આંતરરાષ્ટ્રીય બાબતો

સરહદી વિસ્તારોમાં નાગરિકોની સુરક્ષા અને ઘૂસણખોરી રોકવા માટે સુરક્ષા દળો દ્વારા સતત ચોકી અને કડક પગલાં લેવા અનિવાર્ય છે.