સિટી ન્યુઝ @ કેશોદ

કેશોદ શહેર અને આસપાસના ગ્રામ્ય વિસ્તારોમાં પીજીવીસીએલ (PGVCL) દ્વારા વીજ વિતરણ વ્યવસ્થાને હાઈટેક બનાવવા સ્માર્ટ મીટર લગાવવાની કામગીરી યુદ્ધના ધોરણે ચાલી રહી છે. અત્યાર સુધીમાં 7000 થી વધુ સ્માર્ટ મીટર સફળતાપૂર્વક લગાવીને વિભાગે ભ્રામક અફવાઓ ફેલાવતા તત્વોને આકરો જવાબ આપ્યો છે. આ નવા સ્માર્ટ મીટર દ્વારા ગ્રાહકોને તેમના વીજ વપરાશની સચોટ અને રિયલ ટાઈમ માહિતી મળશે, જેનાથી બિલિંગ પ્રક્રિયા વધુ પારદર્શક બનશે અને મેન્યુઅલ રીડિંગની જૂની સિસ્ટમનો કાયમી અંત આવશે.

પીજીવીસીએલના કાર્યપાલક ઇજનેર જી. બી. વાઘેલાએ આક્રમક અપીલ કરતા જણાવ્યું છે કે, ગ્રાહકોએ કોઈપણ પ્રકારની ખોટી અફવાઓ કે ભ્રમમાં ફસાયા વિના મીટર લગાવવા આવતા કર્મચારીઓને પૂરો સહકાર આપવો જોઈએ. સ્માર્ટ મીટર અને જૂના સામાન્ય મીટરમાં કોઈ જ ફરક નથી. ઉલટાનું, સ્માર્ટ મીટરથી ગ્રાહકોને મોટો ફાયદો થશે. 1 એપ્રિલથી સવારના 11 થી સાંજના 5 વાગ્યા સુધીના સમયગાળામાં વપરાતા વીજ યુનિટ દીઠ ઘરવપરાશમાં 60 પૈસાનું માતબર વળતર સીધું ગ્રાહકોને મળશે. આ રિયલ ટાઈમ ડેટા મળવાથી ઓવરલોડની ભયાનક સમસ્યાઓ પણ તાત્કાલિક ઉકેલી શકાશે.

વિભાગે સ્પષ્ટ ચેતવણી આપી છે કે લોકોની ખોટી વાતોમાં આવીને કર્મચારીઓ સાથે માથાકૂટ કરવી નહીં. જ્યારે કોઈ ગ્રાહક સ્માર્ટ મીટર લગાવવાનો વિરોધ કરે છે, ત્યારે વિભાગ તેમને કડક નોટિસ ફટકારીને પૂરી સમજણ આપે છે. જો છતાંય કોઈ શંકા રહે તો એક્યુચેક અને ચેક મીટર લગાવીને સ્થળ પર જ તમામ ભ્રમ દૂર કરવામાં આવે છે. સાચો ડેટા ન મળવાના કારણે ઉનાળાની આક્રી ગરમીમાં વીજ પુરવઠામાં પડતી તકલીફો દૂર કરવા અને શ્રેષ્ઠ સેવા આપવા માટે પીજીવીસીએલ હાલ 100 ટકા એક્શન મોડમાં આવી ગયું છે.

સ્માર્ટ મીટરથી ગ્રાહકોને થશે મોટો આર્થિક ફાયદો

સ્માર્ટ મીટર માત્ર પીજીવીસીએલ માટે જ નહીં પણ ગ્રાહકો માટે પણ અત્યંત ફાયદાકારક સાબિત થઈ રહ્યા છે. જૂના મીટરની સરખામણીમાં આ નવા મીટર ગ્રાહકોને બપોરના 11 થી 5 ના સમયગાળામાં વીજ વપરાશ પર પ્રતિ યુનિટ 60 પૈસાનું સીધું ડિસ્કાઉન્ટ આપે છે. અફવાઓથી દૂર રહીને સ્માર્ટ મીટર અપનાવવાથી વીજળીની બચત અને પારદર્શક બિલિંગનો મોટો લાભ દરેક ઘરને મળશે.