સિટી ન્યૂઝ @ અમદાવાદ: અમદાવાદ મ્યુનિસિપલ કોર્પોરેશન (AMC) ની ચૂંટણીમાં સત્તા મેળવવા માટે ખોટા દસ્તાવેજોનો સહારો લેવાનો એક ચોંકાવનારો કિસ્સો પ્રકાશમાં આવ્યો છે. કુબેરનગર વોર્ડના વર્તમાન કોંગ્રેસના કોર્પોરેટર કલ્પનાબહેન નવલેકર સામે ચૂંટણી ઉમેદવારી પત્રકમાં કૃષ્ણનગર વિદ્યાવિહાર હાઈસ્કૂલનું ખોટું અને બોગસ સ્કૂલ લિવિંગ સર્ટિફિકેટ (LC) રજૂ કરવા બદલ કાયદેસરની પોલીસ ફરિયાદ નોંધાઈ છે. આ ઘટનાને પગલે શહેરના રાજકીય અને શૈક્ષણિક વર્તુળોમાં ભારે ચકચાર મચી જવા પામી છે.

આ મામલે મણિનગરના રહીશ અને છેલ્લા 20 વર્ષથી કૃષ્ણનગર વિદ્યાવિહાર હાઈસ્કૂલના મેનેજિંગ ટ્રસ્ટી તરીકે સેવા આપતા અશોકકુમાર પટેલે ફરિયાદ નોંધાવી છે. તેમની ફરિયાદ મુજબ, કલ્પનાબહેન નવલેકરે તેમની શાળામાં ક્યારેય અભ્યાસ કર્યો ન હોવા છતાં, શાળાના લેટરહેડ અને સિક્કાનો દુરુપયોગ કરી ખોટું પ્રમાણપત્ર ઊભું કર્યું હતું. આ નકલી દસ્તાવેજને સાચા તરીકે રજૂ કરીને વર્ષ 2026ની અમદાવાદ મ્યુનિસિપલ કોર્પોરેશનની ચૂંટણીમાં નામાંકન સમયે ગેરમાર્ગે દોરવા બદલ ટ્રસ્ટીએ કાયદેસરની કાર્યવાહી હાથ ધરી છે.

આ આખા કૌભાંડનો પર્દાફાશ મોટેરાના રહીશ ચિરાગ શાહ દ્વારા કરવામાં આવેલી અરજી બાદ થયો છે. જિલ્લા શિક્ષણ અધિકારીને 24 April ના રોજ કરવામાં આવેલી આ રજૂઆતને પગલે શિક્ષણ વિભાગ હરકતમાં આવ્યું હતું. શિક્ષણ નિરીક્ષક આર.એમ. માકડિયા અને મદદનીશ નિરીક્ષક હિમાંશુ વ્યાસ દ્વારા કરવામાં આવેલી પ્રાથમિક તપાસમાં શાળાના અસલ રેકોર્ડની ચકાસણી કરવામાં આવતા તંત્ર સ્તબ્ધ થઈ ગયું હતું. તપાસમાં જાણવા મળ્યું હતું કે સર્ટિફિકેટમાં દર્શાવેલા આંકડા તદ્દન ખોટા હતા.

તપાસ અહેવાલ મુજબ, કલ્પનાબહેને રજૂ કરેલા LC માં જી.આર. નંબર 1248 દર્શાવાયો હતો, પરંતુ શાળાના રજિસ્ટરમાં આ નંબર પર ચાવડા હસમુખભાઈનું નામ હતું. તેવી જ રીતે એલ.સી. નંબર 3194 પર સોની અંકિતકુમારનું નામ નોંધાયેલું હતું. આ ઉપરાંત, જે તારીખે પ્રમાણપત્ર ઇશ્યુ થયાનું દર્શાવાયું હતું, તે તારીખે શાળાના કોઈ પણ રેકોર્ડમાં કલ્પનાબહેનના નામની કોઈ જ એન્ટ્રી મળી ન હતી. આમ, સત્તા ભોગવવા માટે બનાવટી દસ્તાવેજોનો ઉપયોગ થયો હોવાનું સ્પષ્ટ રીતે પુરવાર થયું છે.

જિલ્લા શિક્ષણ અધિકારીના કડક આદેશ બાદ, તમામ 8 જેટલા દસ્તાવેજી પુરાવાઓ પોલીસને સોંપવામાં આવ્યા છે અને ગુનો નોંધવામાં આવ્યો છે. હાલમાં આ કેસની વધુ તપાસ પોલીસ ઇન્સ્પેક્ટર વિજય જોષીને સોંપવામાં આવી છે. ચૂંટણી લડવા માટે જરૂરી લઘુત્તમ શૈક્ષણિક લાયકાત કે અન્ય પુરાવાઓમાં છેડછાડ કરવાનો આ મામલો આગામી દિવસોમાં કોર્પોરેટરની બેઠક માટે પણ જોખમી સાબિત થઈ શકે છે. પોલીસે આ મામલે પુરાવા એકત્ર કરી કાયદેસરની ધરપકડની પ્રક્રિયા શરૂ કરી છે.