અંતે મામલતદારની ગાડીમાં જવું પડ્યું

• સિટી ન્યૂઝ@છોટાઉદેપુર

રાજ્યના શિક્ષણ મંત્રી રીવાબા જાડેજાનો કાફલો છોટાઉદેપુર જિલ્લાના ક્વાંટ તાલુકાના અંતરિયાળ વિસ્તારમાં કીચડ અને બિસ્માર રસ્તાના કારણે અટવાઈ જતાં તેમને પોતાની કાર છોડીને મામલતદારની સરકારી ગાડીમાં આગળનો પ્રવાસ કરવો પડ્યો હતો. આ ઘટનાએ અંતરિયાળ વિસ્તારોના માર્ગોની સ્થિતિ ફરી ચર્ચામાં લાવી છે.

શિક્ષણ મંત્રી માનુકલા અને હાફેશ્વર ગામ ખાતે નવનિર્મિત કન્ટેનર શાળાના ઉદ્ઘાટન કાર્યક્રમમાં હાજરી આપવા જઈ રહ્યા હતા. આ દરમિયાન આંબાડુંગર નજીકનો આશરે ૭ કિલોમીટર લાંબો કાચો માર્ગ સતત વરસાદને કારણે કાદવ અને કીચડથી ભરાઈ જતાં કાફલાના વાહનોને આગળ વધવામાં મુશ્કેલી પડી હતી.

મળતી માહિતી મુજબ, શિક્ષણ મંત્રી સાથે જિલ્લા કલેક્ટર, સ્થાનિક ધારાસભ્ય અને અન્ય વહીવટી

અಧಿಕારીઓ પણ કાફલામાં સામેલ હતા. રસ્તાની સ્થિતિ ગંભીર બનતાં મંત્રીની કાર આગળ વધી શકી નહોતી, જેના કારણે તેમને મામલતદારની ગાડીમાં બેસાડીને કાર્યક્રમ સ્થળે પહોંચાડવામાં આવ્યા હતા.

ઘટનાની જાણ થતાં સ્થાનિક વહીવટી તંત્ર દોડતું થયું હતું. JCB મશીનની મદદથી રસ્તો પરનો કાદવ દૂર કરવામાં આવ્યો તેમજ જ્યાં જરૂરી હતું ત્યાં માટી અને કાંકરી નાખી કામચલાઉ રીતે માર્ગ વાહનવ્યવહાર લાયક બનાવવામાં આવ્યો હતો. ત્યારબાદ કાફલો આગળ વધ્યો હતો.

આ ઘટનાને પગલે અંતરિયાળ વિસ્તારોમાં માર્ગ સુવિધાની સ્થિતિ અંગે ફરી પ્રશ્નો ઊભા થયા છે. સ્થાનિકોનું કહેવું છે કે આવા વિસ્તારોમાં મજબૂત અને સર્વમોસમી રસ્તા માત્ર વાહનવ્યવહાર માટે જ નહીં, પરંતુ શિક્ષણ, આરોગ્ય અને અન્ય આવશ્યક સેવાઓ માટે પણ અત્યંત જરૂરી છે.

• કાદવ કીચડમાં ફસાયા ધારાસભ્ય લવિંગજી ઠાકોર
• મહામેહનત બાદ સ્થાનિકોએ બહાર કાઢ્યા
• સિટી ન્યૂઝ@સાંતલપુર

સાંતલપુર પૂરગ્રસ્ત વિસ્તારની મુલાકાત લેવા પહોંચેલા રાધનપુરના ધારાસભ્ય લવિંગજી ઠાકોર શનિવારે ભારે કાદવ-કીચડમાં ફસાઈ ગયા હતા. સ્થાનિક ગામજનો અને સમર્થકોએ ભારે જેહમત અને મહામેહનત બાદ ધારાસભ્યનું સુરક્ષિત રેસ્ક્યુ કરીને બહાર કાઢ્યા હતા. આ ઘટના વિસ્તારમાં ગંભીર સ્થિતિ અને વહીવટી તંત્રની મુશ્કેલીઓનો સાચો ચિતાર આપે છે.

પ્રાપ્ત વિગતો અનુસાર, સાંતલપુર તાલુકાના પૂર અસરગ્રસ્ત વિસ્તારની મુલાકાત લેવા માટે ધારાસભ્ય લવિંગજી ઠાકોર પોતાના કાફલા અને સ્થાનિક કાર્યકરો સાથે પહોંચ્યા હતા. ભારે વરસાદ અને પૂરની સ્થિતિના કારણે આ વિસ્તારમાં મોટા પાયે પાણી ભરાયા હતા અને રસ્તાઓ સંપૂર્ણપણે ક્ષતિગ્રસ્ત થઈ ગયા હતા. જમીન પર ભારે કાદવ અને કીચડ જામી ગયો હતો, જેના કારણે સામાન્ય નાગરિકો માટે પણ અવરજવર કરવી અત્યંત મુશ્કેલ બની ગઈ હતી.

આ કપરી પરિસ્થિતિ વચ્ચે જ્યારે ધારાસભ્ય જનતાની વેદના સાંભળવા અને આગળ વધી રહ્યા હતા, ત્યારે અચાનક તેમનો પગ લપસી ગયો હતો અને તેઓ કાદવમાં ફસાઈ ગયા હતા. કાદવ એટલો વધારે હતો કે તેઓ જાતે બહાર નીકળવા માટે અસમર્થ બન્યા હતા. આ અનાધારી સ્થિતિ જોઈને ત્યાં ઉપસ્થિત સ્થાનિક લોકો અને કાર્યકરો તાત્કાલિક મદદે દોડી આવ્યા હતા.

સ્થાનિક નાગરિકો દ્વારા તાત્કાલિક ધોરણે રેસ્ક્યુ ઓપરેશન હાથ ધરવામાં આવ્યું હતું. મહામેહનત બાદ સ્થાનિક લોકોએ ધારાસભ્ય લવિંગજી ઠાકોરને સુરક્ષિત રીતે કાદવમાંથી બહાર કાઢ્યા હતા. આ ઘટનાનો વીડિયો સોશિયલ મીડિયા પર વાયરલ થતાં જ રાજકીય બેડામાં અને સામાન્ય જનતામાં અનેક પ્રકારની ચર્ચાઓ શરૂ થઈ ગઈ છે. પૂરગ્રસ્ત વિસ્તારોમાં માળખાકીય સુવિધાઓની નબળી હાલત અને વિકાસના દાવાઓની પોલ ખોલતી આ ઘટનાએ પ્રશાસનની કામગીરી સામે પણ મોટા સવાલો ખડા કરી દીધા છે.