સિટી ન્યુઝ @ રાજકોટ 

રાજકોટ મહાનગરપાલિકાનો આવાસ વિભાગ જાણે ભ્રષ્ટાચાર અને વિવાદોનો અડ્ડો બન્યો હોય તેમ એક પછી એક નવા કૌભાંડો પ્રકાશમાં આવી રહ્યા છે. અગાઉ કોર્પોરેટર અને ડેપ્યુટી મેયરના આવાસ હોવાના કૌભાંડો સામે આવ્યા બાદ, હવે મનપાના આવાસ વિભાગમાં વકીલ તરીકે કાર્યરત હિરલ જોશીના નામે પણ આવાસ હોવાનું બહાર આવતા ભારે ચકચાર મચી ગઈ છે.

આ મામલે દિવ્ય ભાસ્કર દ્વારા કરવામાં આવેલી તપાસમાં હિરલબેન જોશીના નામે આવાસ હોવાના દસ્તાવેજો હાથ લાગ્યા હતા, જેમાં તેમણે પોતાની વાર્ષિક આવક માત્ર રૂપિયા 1.50 લાખ દર્શાવી હોવાનું સામે આવ્યું છે. આ અંગે ખુલાસો કરતા હિરલબેને જણાવ્યું હતું કે જ્યારે તેમની વકીલાતની સનદ પણ નહોતી આવી, ત્યારે વર્ષ 2013-14 માં તેમણે નિયમ મુજબ અરજી કરીને આ આવાસ મેળવ્યું હતું અને તમામ દસ્તાવેજો મનપામાં રજૂ કર્યા છે.

બીજી બાજુ, આ વિવાદમાં નવો વળાંક ત્યારે આવ્યો જ્યારે હિરલબેને આવાસ વિભાગના મેનેજર સૂર્યપ્રતાપસિંહ સામે ભરતી પ્રક્રિયાને લઈને RTI કરી હતી. તેમણે આક્ષેપ કર્યો છે કે આ RTI પરત ખેંચવા માટે તેમને દબાણ કરવામાં આવી રહ્યું છે અને વકીલાતની સનદ રદ કરાવવાની ધમકીઓ અપાઈ રહી છે, જ્યારે જરૂર પડશે તો તેઓ વડાપ્રધાન નરેન્દ્ર મોદી સુધી રજૂઆત કરશે.

જ્યારે આ બાબતે આવાસ વિભાગના મેનેજર સૂર્યપ્રતાપસિંહે સ્પષ્ટતા કરતા જણાવ્યું કે એક લાભાર્થીને દસ્તાવેજ કરી આપવાનો ઇનકાર કરવા અંગે તેમણે હિરલબેનને કારણદર્શક નોટિસ ફટકારી હતી, ત્યારબાદ તેમણે બદલાની ભાવનાથી અંગત માહિતી માંગતી RTI કરી છે જે યોગ્ય નથી અને દબાણ કરવાનો કોઈ સવાલ જ નથી ઉદ્ભવતો.

રાજકોટ મનપાના સેન્ટ્રલ ઝોન વોર્ડ નંબર 3 ના પોપટપરા વિસ્તારમાં આવેલી ‘છત્રપતિ શિવાજી ટાઉનશીપ’ નામે 2 BHK ની આ યોજના માટે 22 મે, 2015 ના રોજ ડ્રો યોજાયો હતો. આવાસ વિભાગના અધિકારીઓ અને કાનૂની સલાહકારો વચ્ચેના આ આંતરિક ગજગ્રાહ અને એક પછી એક ખુલતા કૌભાંડોથી મનપાની છબી ખરડાઈ છે, ત્યારે મ્યુનિસિપલ કમિશનર આ મામલે ક્યારે અને કેવા કડક પગલાં લે છે તે જોવું રહ્યું.

મનપાના આવાસ વિભાગમાં અનિયમિતતાઓ અને જવાબદારી

સરકારી આવાસ યોજનાઓનો લાભ ખરેખર જરૂરિયાતમંદ અને ગરીબ પરિવારો સુધી પહોંચવો જોઈએ, પરંતુ જ્યારે સત્તા અને વહીવટી પદ પર બેઠેલા લોકો જ તેનો લાભ લેતા નજરે પડે છે ત્યારે પારદર્શિતા પર ગંભીર સવાલો ઊભા થાય છે. તંત્ર દ્વારા નિષ્પક્ષ તપાસ કરીને દોષિતો સામે કડક કાર્યવાહી કરવી અનિવાર્ય છે.