સિટી ન્યુઝ @ ગાંધીનગર

ગાંધીનગર સ્પેશિયલ ઓપરેશન ગ્રૂપ (SOG) દ્વારા બાતમીના આધારે એસ.ટી. ડેપોના કંપાઉન્ડમાં આવેલા પાર્કિંગ પાસેથી અમદાવાદની એક મહિલાને ૨૦ ગ્રામ મેફેડ્રોન (MD) ડ્રગ્સના જથ્થા સાથે ઝડપી પાડવામાં આવી છે. આ કાર્યવાહી દરમિયાન પોલીસે ૬૭ હજારથી વધુનો મુદ્દામાલ જપ્ત કરીને નશીલા પદાર્થોની હેરાફેરીના આ નેટવર્કનો પર્દાફાશ કર્યો છે, જ્યારે આ ગુનામાં સંડોવાયેલા મહિલાના પતિને વોન્ટેડ જાહેર કરીને તેની ધરપકડ માટે તપાસના ચક્રો ગતિમાન કર્યા છે.

ગાંધીનગર SOG પીઆઈ એચ.પી.ભાટીની ટીમને મળેલી ચોક્કસ બાતમીના પગલે એસટી ડેપોમાં લીલા રંગની સાડી પહેરેલી પરેશાબેન વિષ્ણુભાઈ ઠાકોર (ઉ.વ. ૪૯, રહે. વેજલપુર, અમદાવાદ; મૂળ-કલોલ) ને કોર્ડન કરવામાં આવી હતી. મહિલા પોલીસકર્મીઓ દ્વારા તેની અંગજડતી કરતા એક થેલામાંથી માવાની મીઠાઈના પેકેટ અને વેફર સાથે એક પારદર્શક જીપ લોક બેગ મળી આવી હતી, જેમાં ઓફ-વાઇટ કલરનો પાવડર ભરેલો હતો. એફએસએલ (FSL) દ્વારા કરાયેલા પરીક્ષણમાં આ પદાર્થ મેફેડ્રોન (MD) ડ્રગ્સ હોવાનું સાબિત થયું હતું, જેનું વજન ૨૦.૦૮ ગ્રામ અને બજાર કિંમત ૬૨,૪૦૦ રૂપિયા આંકવામાં આવી છે. પૂછપરછમાં આરોપી મહિલાએ કબૂલાત કરી હતી કે આ નશીલો પદાર્થ તેના પતિ વિષ્ણુભાઈ છનાજી ઠાકોર દ્વારા વિસત ચોકડી ખાતેથી આપવામાં આવ્યો હતો અને તેને ડેપોમાં ઉતરીને રાહ જોવાનું કહેવાયું હતું. પોલીસે સમગ્ર મામલે ગુનો નોંધીને ફરાર પતિની શોધખોળ શરૂ કરી છે.

યુવાધન અને સુરક્ષા

યુવા પેઢીને બરબાદ કરતા ડ્રગ્સ અને નશીલા પદાર્થોના વેપાર સામે સુરક્ષા દ્વારા ચલાવવામાં આવતી આવી સઘન ઝુંબેશ સામાજિક સ્વાસ્થ્ય અને સુરક્ષા માટે અત્યંત આવશ્યક છે.