સિટી ન્યુઝ @ જૂનાગઢ

જૂનાગઢ ખેતીવાડી ઉત્પન્ન બજાર સમિતિ (APMC) ની સામાન્ય ચૂંટણી 2026 અંતર્ગત આજે સવારથી ચુસ્ત પોલીસ બંદોબસ્ત વચ્ચે શાંતિપૂર્ણ અને ભારે ઉત્સાહસભર વાતાવરણમાં મતદાન પ્રક્રિયા હાથ ધરવામાં આવી છે. જૂનાગઢ માર્કેટિંગ યાર્ડની સંચાલક મંડળની કુલ 16 બેઠકો પૈકી વેપારી વિભાગની 4 અને સહકારી ખરીદ-વેચાણ સંઘ વિભાગની 2 બેઠકો મળીને કુલ 6 બેઠકો અગાઉથી જ બિનહરીફ જાહેર થઈ ચૂકી છે. હાલમાં ખેડૂત વિભાગની બાકી રહેલી 10 બેઠકો પર કબ્જો જમાવવા માટે ભાજપ પ્રેરિત 10 અને આમ આદમી પાર્ટી પ્રેરિત 7 ઉમેદવારો મળીને કુલ 17 ઉમેદવારો વચ્ચે કાંટાની ટક્કર ચાલી રહી છે.

માર્કેટિંગ યાર્ડના વિકાસ કામો અને સહમતીના ભાગરૂપે વેપારી તેમજ સહકારી ક્ષેત્રની બેઠકો બિનહરીફ રહી છે. બિનહરીફ વિજેતા જાહેર થયેલા ડિરેક્ટર કિરીટ પટેલે જણાવ્યું હતું કે, ખેડૂત પેનલની 10 બેઠકો માટે જૂનાગઢ તાલુકાના 45 ગામોના ખાતેદાર ખેડૂત મતદારો અને સહકારી મંડળીઓની વ્યવસ્થાપક કમિટીના નિયામક મંડળના સભ્યો ઉત્સાહપૂર્વક મતદાન કરી રહ્યા છે. તેમણે વિશ્વાસ વ્યક્ત કર્યો હતો કે આવતીકાલે જાહેર થનારા પરિણામોમાં ભારતીય જનતા પાર્ટી પ્રેરિત ખેડૂત પેનલ તમામ બેઠકો પર ભવ્ય વિજય હાંસલ કરશે.

ચૂંટણી અધિકારી એન. ડી. ગોહિલે વિગતો આપતાં જણાવ્યું હતું કે, ખેડૂત વિભાગમાં કુલ 955 માન્ય મતદારો નોંધાયેલા છે, જેમના માટે યાર્ડ પરિસરમાં સુવ્યવસ્થિત 3 મતદાન મથકો ઊભા કરવામાં આવ્યા છે. સવારે 9:00 વાગ્યાથી શરૂ થયેલું મતદાન સાંજે 5:00 વાગ્યા સુધી સંપન્ન થશે. મતદાન પ્રક્રિયા પૂર્ણ થયા બાદ તમામ મતપેટીઓને સ્ટ્રોંગ રૂમમાં સુરક્ષિત રાખવામાં આવશે અને આવતીકાલે સવારે 9:00 વાગ્યાથી મતગણતરી હાથ ધરીને સત્તાવાર પરિણામો જાહેર કરવામાં આવશે.

જૂનાગઢ APMC ચૂંટણીનું મતદાન શરૂ

જૂનાગઢ માર્કેટિંગ યાર્ડની ખેડૂત વિભાગની 10 બેઠકો માટે આજે શાંતિપૂર્ણ માહોલમાં મતદાન યોજાયું છે, જેમાં ભાજપ અને AAP પ્રેરિત કુલ 17 ઉમેદવારો મેદાનમાં છે. વેપારી અને સહકારી વિભાગની 6 બેઠકો અગાઉ જ બિનહરીફ થઈ ચૂકી છે. 45 ગામોના 955 મતદારો સાંજે 5 વાગ્યા સુધી મતદાન કરશે, જ્યારે મતગણતરી આવતીકાલે સવારે 9 વાગ્યાથી શરૂ થઈ પરિણામ જાહેર કરાશે.