• દિવાળીપુરામાં સાયકલ સવાર સિનિયર સિટિઝનનો ચમત્કારિક બચાવ - રૂવાડા ઊભા કરી દે તેવા CCTV ફૂટેજ આવ્યા સામે
• અકસ્માત બાદ માર્ગ પર અફરાતફરી - ગંભીર રીતે ઇજાગ્રસ્ત વૃદ્ધ હોસ્પિટલમાં જિંદગી અને મોત વચ્ચે ઝોલા ખાઈ રહ્યા છે
• અકોટા પોલીસ એક્શનમાં, CCTV ના આધારે તપાસ શરૂ - વાહનચાલકોની બેદરકારીથી નાગરિકોના જીવ જોખમમાં

વડોદરાના દિવાળીપુરા વિસ્તારમાં આજે એક એવી ઘટના બની જેણે જોનારાઓના કાળજા ધ્રુજાવી દીધા છે. એક કારચાલકની ગંભીર બેદરકારીને કારણે રોડ પરથી પસાર થઈ રહેલા એક નિર્દોષ વૃદ્ધ મોતના મુખમાં જતા રહી ગયા છે. રિવર્સમાં લેતી વખતે કારચાલકે કાર પરનો કાબૂ એટલી હદે ગુમાવ્યો કે કારે પાછળ આવી રહેલા સાયકલ સવારને અડફેટે લીધા અને તેમને 20 ફૂટ સુધી ઢસડ્યા બાદ કાર ડિવાઈડર પર ચડી ગઈ હતી.

CCTVમાં કેદ થયો મોતનો લાઈવ મંજર ઘટનાના જે CCTV ફૂટેજ સામે આવ્યા છે તે અત્યંત ચોંકાવનારા છે. તેમાં સ્પષ્ટ જોઈ શકાય છે કે વૃદ્ધ પોતાની સાયકલ પર શાંતિથી જઈ રહ્યા હતા, ત્યારે અચાનક એક સફેદ કાર ફૂલ સ્પીડમાં રિવર્સમાં આવે છે અને વૃદ્ધને અડફેટે લે છે. અકસ્માત એટલો જોરદાર હતો કે વૃદ્ધ કારની નીચે ફસાઈ ગયા હોવા છતાં ચાલકે બ્રેક મારવાને બદલે એક્સિલરેટર દબાવ્યું હોય તેમ જણાય છે, જેના કારણે કાર ડિવાઈડર કૂદાવીને બીજી બાજુ પહોંચી ગઈ હતી.

લોકોએ મચાવી બચાવ કામગીરી અકસ્માત થતા જ આસપાસના લોકો 'બચાવો બચાવો' ની બૂમો પાડતા દોડી આવ્યા હતા અને કાર નીચે ફસાયેલા વૃદ્ધને બહાર કાઢ્યા હતા. રસ્તા પર લોહીલુહાણ હાલતમાં પડેલા વૃદ્ધને જોઈ લોકોમાં ભારે રોષ જોવા મળ્યો હતો. અકોટા પોલીસની ટીમે તાત્કાલિક ઘટનાસ્થળે પહોંચી ટ્રાફિક હળવો કર્યો હતો અને ઇજાગ્રસ્તને સારવાર માટે મોકલ્યા હતા. હાલમાં આ મામલે કારચાલક વિરુદ્ધ ગુનો નોંધવાની તજવીજ ચાલી રહી છે.