Loading Please Wait !!!
અમદાવાદમાં નકલી નોટોના બંડલ સાથે બે ઝડપાયા!

  • ઊંઝાના વેપારીને 40 લાખની નકલી નોટો પધરાવી!
  • 5 હજારના કમિશન માટે આરોપીઓ રમતા હતા ખેલ!
  • ઘાટલોડિયા પોલીસે છટકું ગોઠવી બે શખસને દબોચ્યા!

સિટી ન્યુઝ @ અમદાવાદ 

અમદાવાદના ઘાટલોડિયા પોલીસે લાખો રૂપિયાની નકલી નોટોના બંડલ સાથે બે આરોપીને ઝડપી લીધા છે, જ્યારે ઊંઝાના વેપારીને અગાઉ રૂ. 40 લાખની નકલી નોટો પધરાવી ઠગાઈ કરાયા બાદ પોલીસની ટ્રેપમાં આરોપીઓ રંગેહાથ પકડાયા છે.

ઊંઝાના બી.બી. ટ્રેડર્સના વેપારી રોહિતકુમાર પટેલે નાગપુરથી રૂ. 40 લાખ મંગાવવા ઓનલાઈન આંગડિયાનો સંપર્ક કર્યો હતો, જ્યાં 17 નવેમ્બરે બેંકની પટ્ટી મારેલા બંડલમાં ચિલ્ડ્રન બેંક ઓફ ઈન્ડિયા લખેલી નકલી નોટો આપી રૂ. 40 લાખની ઠગાઈ કરવામાં આવી હતી.

ત્યારબાદ વેપારીએ પોલીસ સાથે મળી નાગપુરથી અમદાવાદમાં પિતા નરેન્દ્રભાઈ પટેલના નામે પેમેન્ટ મંગાવવાનું નાટક રચ્યું હતું અને 19 નવેમ્બરે આરોપીઓએ વોટ્સએપ કોલ કરી જાણ કરતા PSI એચ.ડી. જોષી અને ટીમે સોલા રોડ પર પારસનગર પેટ્રોલ પંપ પાસે છટકું ગોઠવ્યું હતું.

પોલીસે છટકું ગોઠવી દિલ્હીના 23 વર્ષીય રાહુલસિંગ વિજયસિંગ ઠાકુર અને રાજસ્થાનના બિકાનેરના 30 વર્ષીય માલચંદ પ્રમેશ્વરલાલ શર્માને નકલી નોટોના બંડલ સાથે ઝડપી લીધા હતા, જેઓ રૂ. 5-5 હજાર કમિશન અને રેલવે ભાડાની લાલચમાં બંડલ પહોંચાડવા આવ્યા હતા.

પૂછપરછમાં ગજાનંદ શર્મા, ધનરાજ અને વરુણ નામના શખસોની સંડોવણી સામે આવતા ઘાટલોડિયા પોલીસે કુલ 5 આરોપી વિરુદ્ધ ગુનો નોંધી મુખ્ય સૂત્રધારો સુધી પહોંચવા વધુ તપાસ હાથ ધરી છે.

ઓનલાઈન આંગડિયા વ્યવહારોમાં છેતરપિંડી અને સતર્કતા

નાણાકીય લેવડદેવડ અને આંગડિયા વ્યવહારોમાં અજાણ્યા માધ્યમ કે ઉતાવળભર્યા વિશ્વાસને કારણે છેતરપિંડીનો ભોગ બનવાનું જોખમ રહે છે. ચલણી નોટોની ખરાઈ, વિશ્વસનીય માધ્યમની ચકાસણી અને શંકા જણાય ત્યારે તાત્કાલિક પોલીસ મદદ આવા ગુનાઓ અટકાવવામાં મહત્વપૂર્ણ બને છે.