હાઈવે પરની હોટેલ-ઢાબામાં 19 નવેમ્બરથી ફૂડ ચેકિંગ!
- ‘ઓપરેશન હેલ્થ’ હેઠળ સમગ્ર ગુજરાતમાં મેગા ડ્રાઈવ!
- ગંદકી કે ભેળસેળ મળશે તો લાઇસન્સ રદ થશે!
- સ્થળ પર જ સેમ્પલ લઈ ટેસ્ટિંગ કરાશે!
સિટી ન્યુઝ @ ગાંધીનગર
ગુજરાતમાં નાગરિકો અને મુસાફરોને શુદ્ધ તથા આરોગ્યપ્રદ ભોજન મળી રહે તે માટે 19 નવેમ્બરથી સમગ્ર રાજ્યમાં ઓપરેશન હેલ્થ હેઠળ ફૂડ સેફ્ટીની મેગા ડ્રાઈવ શરૂ કરવામાં આવી છે, જેમાં નેશનલ અને મુખ્ય હાઈવે પરની હોટેલ, રેસ્ટોરન્ટ અને ઢાબાઓનું ચેકિંગ કરાશે.
આરોગ્ય મંત્રી પ્રફુલ પાનશેરીયાની અધ્યક્ષતામાં મળેલી સમીક્ષા બેઠક બાદ રાજ્યવ્યાપી તપાસના આદેશ અપાયા છે, જે અંતર્ગત તમામ મહાનગરપાલિકાઓ અને જિલ્લાના ડેઝિગ્નેટેડ ઓફિસરોની સીધી દેખરેખ હેઠળ હાઈવે તેમજ શહેરોના ખાદ્ય એકમોની તપાસ કરાશે.
તપાસ દરમિયાન રસોડા, સંગ્રહ સ્થળ અને પરિસરની સ્વચ્છતા પર ધ્યાન અપાશે તથા કારીગરો અને કર્મચારીઓ માટે કેપ, એપ્રોન અને હેન્ડ ગ્લોવ્ઝ ફરજિયાત રહેશે, જ્યારે શંકાસ્પદ ખાદ્યપદાર્થોના સ્થળ પર સેમ્પલ લેવાશે અને ફૂડ સેફ્ટી ઓન વ્હીલ્સ દ્વારા ટેસ્ટિંગ થશે.
ફૂડ સેફ્ટી અધિકારીઓ FoSCoS પોર્ટલ મારફતે ઓનલાઈન ઇન્સ્પેક્શન કરશે અને ફૂડ સેફ્ટી એન્ડ સ્ટાન્ડર્ડ્સ એક્ટ 2006 તથા શિડ્યુલ-4 ના નિયમોના ઉલ્લંઘન પર પહેલા ઇમ્પ્રુવમેન્ટ નોટિસ અપાશે, ત્યારબાદ પણ પાલન ન થાય કે ગંભીર બેદરકારી જણાય તો લાઇસન્સ સસ્પેન્ડ કે રદ કરાશે.
મંત્રી પ્રફુલ પાનશેરીયાએ જણાવ્યું કે નાગરિકો અને મુસાફરોના સ્વાસ્થ્ય સાથે ચેડાં ચલાવી લેવાશે નહીં અને હોટેલ-ઢાબા સંચાલકોએ સ્વચ્છતા તથા ફૂડ સેફ્ટીના નિયમોનું સ્વયંભૂ પાલન કરીને ગ્રાહકોને સુરક્ષિત ભોજન આપવું પડશે.
ખાદ્ય સુરક્ષા, સ્વચ્છતા અને નિયમ પાલનની જવાબદારી
હોટેલ, રેસ્ટોરન્ટ અને ઢાબાઓમાં સ્વચ્છતા તથા ગુણવત્તાયુક્ત ખાદ્ય સામગ્રીનો ઉપયોગ જાહેર આરોગ્ય માટે અત્યંત મહત્વપૂર્ણ છે. કડક તપાસ અને નિયમોના ચુસ્ત અમલથી મુસાફરો અને નાગરિકોને સુરક્ષિત ભોજન મળી રહે તે સુનિશ્ચિત થાય છે.