• લગ્ન પ્રસંગના માતમમાં ફેરવાઈ ખુશી – ભારદારી વાહને દંપતીને અડફેટે લેતા ઘટનાસ્થળે જ જીવ ગયો
• ભારદારી વાહનોનો આતંક યથાવત – સમા પોલીસે ફ્યુલ ભરેલા વાહન ચાલકને ઝડપી પાડ્યો
• વડોદરાના દુમાડ બ્રિજ નીચે ગમખ્વાર અકસ્માત – ગણપતભાઈ પાટણવાડિયાનું કમકમાટીભર્યું મોત

વડોદરા શહેરમાં ભારદારી વાહનોના આતંકને કારણે નિર્દોષ નાગરિકોના જીવ જવાનો સિલસિલો અટકવાનું નામ નથી લઈ રહ્યો. આજે શહેરના દુમાડ ચોકડી બ્રિજ નીચે વધુ એક ગમખ્વાર અકસ્માત સર્જાયો હતો. આ દુર્ઘટનામાં લગ્ન પ્રસંગે જઈ રહેલા એક દંપતીને ભારે વાહને અડફેટે લેતા પત્નીની નજર સામે જ પતિનું ઘટનાસ્થળે જ કરુણ મોત નીપજ્યું હતું. આ ઘટનાને પગલે હાઈવે પર લોકોના ટોળા ઉમટી પડ્યા હતા અને વાતાવરણમાં ગમગીની છવાઈ ગઈ હતી.

મળતી વિગતો અનુસાર, ભરૂચ જિલ્લાના વાસણા-આમોદ વિસ્તારમાં રહેતા ગણપતભાઈ મોહનભાઈ પાટણવાડિયા પોતાની પત્ની સાથે વડોદરાના આસોજ ગામે એક લગ્ન પ્રસંગમાં હાજરી આપવા જઈ રહ્યા હતા. દંપતી હજુ વડોદરા પહોંચ્યું જ હતું ત્યાં દુમાડ ચોકડી પાસેના બ્રિજ નીચે પૂરપાટ ઝડપે આવતા ફ્યુલ ભરેલા એક ભારદારી વાહને તેમના વાહનને અડફેટે લીધું હતું. ટક્કર એટલી જોરદાર હતી કે ગણપતભાઈ ગંભીર રીતે ઇજાગ્રસ્ત થયા હતા અને તેમણે ત્યાં જ દમ તોડ્યો હતો.

આ કરુણ અકસ્માતમાં ગણપતભાઈની પત્ની બાઈક પરથી બાજુમાં ફેંકાઈ ગઈ હતી, જેના કારણે તેમનો આબાદ બચાવ થયો હતો. જોકે, પોતાની આંખો સામે જ જીવનસાથીને દમ તોડતા જોઈ તે સ્તબ્ધ થઈ ગઈ હતી અને રડતા-રડતા બેભાન જેવી સ્થિતિમાં મુકાઈ ગઈ હતી. જે પરિવારમાં લગ્નને લઈને આનંદનો માહોલ હતો, ત્યાં અચાનક મોતના સમાચાર પહોંચતા જ શોકનું મોજું ફરી વળ્યું છે.

ઘટનાની જાણ થતા જ સમા પોલીસ મથકનો કાફલો તાત્કાલિક સ્થળ પર દોડી આવ્યો હતો. પોલીસે ગણપતભાઈના મૃતદેહનો કબજો મેળવી પોસ્ટમોર્ટમ માટે વડોદરાની સયાજી હોસ્પિટલ ખાતે ખસેડ્યો હતો. પોલીસે સતર્કતા દાખવીને અકસ્માત સર્જનાર ફ્યુલ ભરેલા વાહન ચાલકની અટકાયત કરી છે. ભારદારી વાહનોના પ્રવેશ અને ઝડપને લઈને સ્થાનિક રહીશોમાં પણ રોષ જોવા મળી રહ્યો છે.

રાજકોટ સહિત ગુજરાતભરના હાઈવે પર અકસ્માતોની સંખ્યા વધી રહી છે ત્યારે દુમાડ ચોકડીની આ ઘટના ફરી એકવાર રોડ સેફ્ટી અને ભારે વાહનોના નિયંત્રણ સામે સવાલો ઊભા કરે છે. સમા પોલીસે આ મામલે અકસ્માતે મોતનો ગુનો નોંધીને કાયદેસરની કાર્યવાહી શરૂ કરી છે. મૃતકના પરિવારજનો ભરૂચથી વડોદરા પહોંચ્યા બાદ હોસ્પિટલ પરિસરમાં હૃદયદ્રાવક દ્રશ્યો સર્જાયા હતા.