સિટી ન્યુઝ @ રાજકોટ

આગામી દિવસોમાં કેન્દ્રીય કેબિનેટના વિસ્તરણ અને પુનઃરચનાની પ્રબળ શક્યતાઓ વચ્ચે ઉત્તર પ્રદેશ, ગુજરાત અને મધ્યપ્રદેશ સહિતના રાજ્યોના રાજ્યપાલો બદલાશે તેવી રાજકીય અટકળો તેજ બની છે. આ દરમિયાન ઉત્તર પ્રદેશના રાજ્યપાલ અને ગુજરાતના પૂર્વ મુખ્યમંત્રી આનંદીબેન પટેલે રક્ષાબંધન પર્વ નિમિત્તે એક સપ્તાહની રજા મૂકતાં જ રાજકીય વર્તુળોમાં તેમની બદલી અથવા વિદાય અંગેની ચર્ચાઓ શરૂ થઈ ગઈ છે. ચર્ચા એવી પણ છે કે આગામી સમયની ચૂંટણીઓને ધ્યાને રાખી ભાજપ પોતાની વોટબેન્ક મજબૂત કરવા યુપીમાં નવા રાજ્યપાલ તરીકે કોઈ અગ્રણી બ્રાહ્મણ ચહેરાને સ્થાન આપી શકે છે.

બીજી તરફ, તાજેતરમાં મુખ્યમંત્રી યોગી આદિત્યનાથના ગઢ ગણાતા ગોરખપુરમાં યુનિવર્સિટીના દીક્ષાંત સમારોહ દરમિયાન આનંદીબેન પટેલે હોસ્ટેલ વ્યવસ્થા પર કરેલી આકરી ટિપ્પણીથી વહીવટી તંત્ર ચોંકી ઉઠ્યું હતું. આ ઘટનાના બીજા જ દિવસે મુખ્યમંત્રી યોગી આદિત્યનાથે દિલ્હી ખાતે વડાપ્રધાન નરેન્દ્ર મોદી સાથે મહત્વપૂર્ણ બેઠક યોજી હતી. વડાપ્રધાન મોદી અને આનંદીબેન પટેલ વચ્ચે લાંબા સમયથી ગાઢ રાજકીય સંબંધો રહ્યા છે.

આ સાથે જ આનંદીબેન પટેલ સાથે ગુજરાતનું રાજકીય પરિબળ પણ જોડાયેલું છે. રાજ્યમાં પાટીદાર મતદારોનું વિશેષ મહત્વ છે. આનંદીબેનના પુત્રી અનાર પટેલની ખોડલધામ ટ્રસ્ટના પ્રમુખ પદે થયેલી નિયુક્તિ પણ સૂચક માનવામાં આવે છે. જો આનંદીબેન રાજ્યપાલ પદેથી મુક્ત થાય તો પણ ગુજરાતના રાજકારણમાં તેમનો પ્રભાવ અને સન્માન એક શક્તિશાળી પરિબળ તરીકે યથાવત્ રહેશે.

યુપીના રાજ્યપાલ આનંદીબેનની વિદાયની ચર્ચા

આનંદીબેન પટેલે 1 સપ્તાહની રજા લેતાં યુપીમાં નવા રાજ્યપાલની નિમણૂકની અટકળો તેજ બની છે. રાજ્યની 60 થી વધુ બેઠકો પર પ્રભાવ ધરાવતી બ્રાહ્મણ વોટબેન્કને સાધવા ભાજપ બ્રાહ્મણ ચહેરાને રાજ્યપાલ બનાવી શકે છે. બીજી તરફ, અનાર પટેલની ખોડલધામ પ્રમુખ પદે નિયુક્તિ બાદ ગુજરાતના પાટીદાર રાજકારણમાં પણ આનંદીબેનનું પરિબળ મહત્વનું બની રહેશે.