સિટી ન્યુઝ @ ભાવનગર

ભાવનગર, ભાવનગર સ્પેશિયલ ઓપરેશન ગ્રુપ (SOG)ની ટીમે ગ્રામ્ય વિસ્તારમાં પેટ્રોલિંગ દરમિયાન મળેલી ચોક્કસ બાતમીના આધારે પીપળીયા પુલ નજીકથી એક શખ્સને ગેરકાયદેસર દેશી બનાવટની પિસ્તોલ સાથે ઝડપી પાડ્યો છે. પોલીસે આરોપી પાસેથી હથિયાર કબજે કરી ઘોઘા પોલીસ મથકમાં કાયદેસરની કાર્યવાહી હાથ ધરી છે.

SOGનો સ્ટાફ જ્યારે પેટ્રોલીંગમાં હતો ત્યારે બાતમી મળી હતી કે પીપળીયા પુલથી ઘોઘા જવાના રસ્તે રણજીત કાંટા પાસે એક શખ્સ ગેરકાયદેસર હથિયાર સાથે ઊભો છે. આ બાતમીના આધારે ટીમે તાત્કાલિક દરોડો પાડીને સંજય શુકલભાઈ સાંખટ (રહે. તપોવન સ્કૂલની પાછળ, મહેશ્વરી સોસાયટી, ચિત્રા, ભાવનગર) નામના શખ્સને ઝડપી લીધો હતો.

અટકાયત બાદ આરોપીની અંગજડતી લેતાં તેની પાસેથી રૂ. ૫,૦૦૦ ની કિંમતની દેશી બનાવટની પિસ્તોલ મળી આવી હતી. SOG દ્વારા પિસ્તોલ કબજે કરીને આરોપી વિરુદ્ધ આર્મ્સ એક્ટ હેઠળ ગુનો નોંધીને આગળની તપાસ શરૂ કરવામાં આવી છે.

કાયદો અને વ્યવસ્થા

ગેરકાયદેસર હથિયારો રાખીને ગુનાહિત પ્રવૃત્તિઓ આચરતા તત્વો સામે પોલીસ દ્વારા સતત ચોકસાઈ રાખીને કડક કાર્યવાહી કરવામાં આવતી હોય છે.