નવી દિલ્હી: રક્ષા મંત્રી રાજનાથ સિંહે ગુરુવારે પાકિસ્તાન સામે કડક વલણ અખત્યાર કરતા જણાવ્યું હતું કે, ભારત હવે માત્ર નિવેદનો આપનારો દેશ નથી રહ્યો, પરંતુ આતંકવાદ સામે સીધી અને કડક કાર્યવાહી કરવામાં વિશ્વાસ રાખે છે. તેમણે સ્પષ્ટ કર્યું હતું કે 'ઓપરેશન સિંદૂર' ને ભારતે પોતાની મરજી અને પોતાની શરતો પર જ રોક્યું હતું. પાકિસ્તાન તરફથી આપવામાં આવેલી પરમાણુ હુમલાની ધમકીઓની ભારત પર કોઈ અસર થઈ નથી અને દેશ કોઈપણ સંજોગોમાં લાંબી લડાઈ લડવા માટે સક્ષમ અને સજ્જ છે.

રાજનાથ સિંહે પાકિસ્તાન પર કટાક્ષ કરતા કહ્યું હતું કે, આજે વિશ્વ ભારતને ઈન્ફોર્મેશન ટેકનોલોજી (IT) ના હબ તરીકે ઓળખે છે, જ્યારે પાકિસ્તાનની ઓળખ 'ઈન્ટરનેશનલ ટેરરિઝમ' (IT) ના કેન્દ્ર તરીકેની બની ગઈ છે. તેમણે ઉમેર્યું હતું કે વડાપ્રધાનના નેતૃત્વમાં સરકારની નીતિ અત્યંત સ્પષ્ટ છે; દેશની ધરતી પર કોઈપણ આતંકી હુમલો સહન કરવામાં આવશે નહીં. આતંકવાદને જડમૂળથી ખતમ કરવા માટે તેની પાછળ રહેલી વિચારધારા અને રાજકીય સમર્થનને તોડવું અનિવાર્ય છે.

'ઓપરેશન સિંદૂર' અંગે માહિતી આપતા રક્ષા મંત્રીએ જણાવ્યું કે, ગયા વર્ષે પહેલગામમાં થયેલા આતંકી હુમલાના જવાબમાં 7 મે 2025 ના રોજ આ ઓપરેશન શરૂ કરવામાં આવ્યું હતું. ભારતીય સેનાએ પાકિસ્તાન અને PoJK (પાકિસ્તાન અધિકૃત જમ્મુ-કાશ્મીર) માં આતંકીઓના ઠેકાણાઓને નિશાન બનાવ્યા હતા. આ કાર્યવાહી દરમિયાન 9 મોટા લોન્ચપેડનો નાશ કરવામાં આવ્યો હતો અને 100 થી વધુ આતંકીઓનો સફાયો કરવામાં આવ્યો હતો. રક્ષા મંત્રીના આ નિવેદનોથી સ્પષ્ટ થાય છે કે ભારત તેની સુરક્ષા અને આતંકવાદ વિરોધી અભિયાનમાં કોઈપણ પ્રકારની બાંધછોડ કરવા તૈયાર નથી.