=> 46 ગૂનાઓ આચર્યા 5 ઝડપાયા એક ફરાર

સિટી ન્યૂઝ@રાજકોટ

રાજકોટ શહેર ક્રાઈમ બ્રાંચ દ્વારા ગુનાહિત પ્રવૃત્તિઓ સામે મોટી અને આક્રમક કાર્યવાહી હાથ ધરીને વધુ એક ગેંગ વિરુદ્ધ ગુજસીટોક (GUJSITOC) હેઠળ ગુનો દાખલ કરવામાં આવ્યો છે. શહેર અને આસપાસના વિસ્તારોમાં લાંબા સમયથી આતંક મચાવતી અલ્તાફ ઉર્ફે 'છ આંગળી' ની ગેંગ પર પોલીસે સકંજો કસ્યો છે. આ ગેંગ સામે અત્યાર સુધીમાં કુલ 

46 જેટલા ગંભીર ગુનાઓ નોંધાયેલા હોવાનું સત્તાવાર રીતે સામે આવ્યું છે.પોલીસ દ્વારા હાથ ધરાયેલા મેગા ઓપરેશન દરમિયાન આ ગેંગના 6 માંથી 5 આરોપીઓને ઝડપી પાડવામાં મોટી સફળતા મળી છે. જોકે, આ આખી ગેંગનો મુખ્ય સૂત્રધાર અને લીડર અલ્તાફ છ આંગળી હાલ પોલીસને ચકમો આપીને ફરાર થઈ ગયો છે. ક્રાઈમ બ્રાંચની અલગ અલગ ટીમો બનાવીને ફરાર અલ્તાફને પકડી પાડવા માટે સઘન શોધખોળ અને દરોડાની કામગીરી તેજ કરવામાં આવી છે. અલ્તાફ વિરુદ્ધ પ્રોહિબિશન અધિનિયમ હેઠળ પણ અગાઉ અનેક ગુનાઓ નોંધાયેલા છે.

પોલીસની ઊંડાણપૂર્વકની તપાસમાં બહાર આવ્યું છે કે અલ્તાફની આ ગેંગ માત્ર રાજકોટ પૂરતી જ સીમિત નહોતી, પરંતુ મોરબી અને જૂનાગઢ જિલ્લામાં પણ સક્રિય હતી. ગેંગના સભ્યો દ્વારા વ્યવસ્થિત રીતે દારૂ અને જુગાર જેવી ગેરકાયદેસર પ્રવૃત્તિઓનું મોટું નેટવર્ક ચલાવવામાં આવતું હતું. ખાસ કરીને નાના બુટલેગરોને મોટા પાયે વિદેશી દારૂ સપ્લાય કરવાનું મોટું રેકેટ આ ગેંગ દ્વારા સંચાલિત કરવામાં આવતું હોવાનો પોલીસ તપાસમાં પર્દાફાશ થયો છે.

વધુ 2 ગેંગ પર ગુજસીટોકની તૈયારી
ક્રાઈમ બ્રાંચના ઉચ્ચ અધિકારીઓએ સ્પષ્ટ સંકેત આપ્યા છે કે શહેરમાં ગેરકાયદેસર પ્રવૃત્તિઓ અને માથાભારે તત્વો પર સંપૂર્ણ નિયંત્રણ લાવવા માટે પોલીસ એક્શન મોડમાં છે. આવનારા ટૂંક સમયમાં જ શહેરમાં સક્રિય વધુ 2 ગેંગ વિરુદ્ધ પણ ગુજસીટોક જેવા કડક કાયદા હેઠળ કાર્યવાહી કરવામાં આવશે. પોલીસની આ આક્રમક કામગીરીથી ગુનાહિત તત્વો અને બુટલેગરોમાં ભારે ભયનો માહોલ સર્જાયો છે, જેનાથી શહેરમાં કાયદો અને વ્યવસ્થા વધુ મજબૂત બનશે.