રાજકોટ SRPના 55 વર્ષીય ASIની ધરપકડ કરાઈ!
- બાળકીઓને બીભત્સ વીડિયો બતાવી અડપલાં કર્યાનો આરોપ!
- પોક્સો અને એટ્રોસિટી હેઠળ ફરિયાદ નોંધી કાર્યવાહી!
- ટ્યુશનમાં આવતી બાળકી સાથે પણ અડપલાં થયા!
સિટી ન્યુઝ @ રાજકોટ
રાજકોટના ઘંટેશ્વર SRP ગ્રુપ 13 કેમ્પમાં ફરજ બજાવતા 55 વર્ષીય ASI નરેન્દ્રસિંહ મહેન્દ્રસિંહ જાડેજા સામે બાળકીઓને બીભત્સ વીડિયો બતાવી અડપલાં કર્યાની ફરિયાદ નોંધાતા યુનિવર્સિટી પોલીસે તેમની ધરપકડ કરી છે.
રાજકોટ SRPમાં ફરજ બજાવતા મહિલા કર્મચારીએ નોંધાવેલી ફરિયાદમાં કલોધિંગ સ્ટોરમાં રમાડવાના બહાને લઈ જઈ અડપલાં કર્યાનો ઉલ્લેખ છે, તેમજ અન્ય એક પરિવારની 8 વર્ષની બાળકી સાથે પણ આ જ પ્રકારની ઘટના બનતા પોક્સો એક્ટ હેઠળ બે ફરિયાદ નોંધી ઘંટેશ્વર SRP કેમ્પના કમાન્ડન્ટને જાણ કરાઈ છે.
17 નવેમ્બરના રોજ ઘર પાસે રમી રહેલી બાળકીએ આરોપીને જોઈ ડઘાઈ ગયા બાદ પાલક દાદાએ પૂછપરછ કરતા એક વર્ષ પહેલા બનેલી ઘટના સામે આવી હતી, જે અંગે માતાને જાણ થતા તેમણે આરોપીના ઘરે પહોંચી હોબાળો મચાવ્યો હતો અને પોલીસ સ્ટેશનમાં ફરિયાદ નોંધાવી હતી.
આરોપીની દીકરી ઘરે ટ્યુશન કરાવતી હોવાથી ત્યાં આવતી બાળકી સાથે પણ અડપલાં કર્યા હોવાનું સામે આવતા તે પરિવારે પણ યુનિવર્સિટી પોલીસ સ્ટેશનમાં આરોપી વિરુદ્ધ એટ્રોસિટી અને પોક્સો એક્ટ હેઠળ ફરિયાદ નોંધાવી છે.
પોલીસે આરોપી નરેન્દ્રસિંહ જાડેજાની ધરપકડ કરીને કાયદેસરની કાર્યવાહી અને વધુ તપાસ હાથ ધરી છે.
બાળ સુરક્ષા અને કાયદાકીય કાર્યવાહીનું મહત્વ
બાળકોની સુરક્ષા અને સલામતી માટે પરિવાર, સમાજ અને તંત્રની સતર્કતા અત્યંત જરૂરી છે. કોઈપણ અયોગ્ય વર્તન કે ગુનાહિત ઘટના સામે તાત્કાલિક કાયદાકીય પગલાં અને સંવેદનશીલ તપાસ પીડિતોને ન્યાય અપાવવા માટે નિર્ણાયક સાબિત થાય છે.