સિટી ન્યુઝ @ સાયલા (સુરેન્દ્રનગર)

સુરેન્દ્રનગર જિલ્લાના સાયલા પોલીસ સ્ટેશન વિસ્તારમાંથી નેશનલ હાઈવે પર રાજકોટ રેન્જની ટીમે મોટી કાર્યવાહી કરીને લાખો રૂપિયાનો વિદેશી દારૂ ઝડપી પાડ્યો છે. પોલીસે ટ્રકની કેબિનમાં ખાસ બનાવવામાં આવેલા ચોરખાનામાંથી સંતાડેલી ૧૪૪ બોટલ ઈંગ્લીશ દારૂ ઝડપી લીધો છે. આ દૈનિક તપાસ અને રેડ દરમિયાન ટ્રક, મોબાઈલ ફોન, મેંદાના લોટની બોરીઓ અને દારૂ સહિત કુલ ૧૯,૫૨,૦૦૪ રૂપિયાનો મુદ્દામાલ જપ્ત કરવામાં આવ્યો છે.

રાજકોટ વિભાગના નાયબ પોલીસ મહાનિરીક્ષક (IG) નિર્લિપ્ત રાય દ્વારા રાજકોટ રેન્જ હેઠળના તમામ જિલ્લાઓમાં ગેરકાયદેસર દારૂ અને જુગારની પ્રવૃત્તિઓ આચરતા તત્વો સામે સખત કાર્યવાહી કરવાના આદેશો આપવામાં આવ્યા હતા. આ સૂચનાના આધારે રાજકોટ રેન્જના પોલીસ ઇન્સ્પેક્ટર અપૂર્વ પટેલના માર્ગદર્શન હેઠળ પોલીસ ટીમો સતત કાર્યરત હતી. પોલીસ સબ ઇન્સ્પેક્ટર પી.એન. મોરી, બી.સી. મિયાત્રા, સી.એમ. કાંટેલીયા, એ.વાય. ઉધાસ અને પોલીસ સ્ટાફના કર્મચારીઓએ ચોક્કસ હ્યુમન સોર્સ દ્વારા મેળવેલી બાતમીના આધારે સાયલા પોલીસ સ્ટેશન વિસ્તારમાં અમદાવાદ-રાજકોટ નેશનલ હાઈવે પર બ્લેક બોર્ન સ્ટોન ક્રશર સામે આવેલી મોમાઈ હોટલના પાર્કિંગમાંથી એક શંકાસ્પદ ટ્રક (RJ-30-GA-6939) ને આડસ કરીને રોકી હતી.

પોલીસે ટ્રકની સઘન તલાશી લેતા કેબિનમાં બનાવેલા ચોરખાનામાંથી ભારતીય બનાવટના પરપ્રાંતીય ઈંગ્લીશ દારૂની અલગ-અલગ બ્રાન્ડની ૧૪૪ બોટલો મળી આવી હતી, જેની બજાર કિંમત ૧,૬૪,૪૦૦ રૂપિયા થાય છે. આ ટ્રકમાં દારૂની સાથેસાથે ૫૮૮ મેંદાના લોટની બોરીઓ પણ ભરેલી હતી, જેથી કોઈને શંકા ન જાય. પોલીસે દારૂ, લોટની બોરીઓ, ટ્રક અને મોબાઈલ ફોન સહિત કુલ રૂ. ૧૯,૫૨,૦૦૪ નો મુદ્દામાલ કબજે કર્યો છે. આ કેસમાં પોલીસે ટ્રક ડ્રાઈવર રમેશચંદ્ર દેવકિશન સુથાર (રહે. મોરચા, તા. કુંભલગઢ, થાના-કેલવાડા, જી. રાજસમંદ, રાજસ્થાન) ની ધરપકડ કરી લીધી છે. જ્યારે આ જથ્થો ભરી આપનાર મુકેશ નામના શખ્સ (રહે. રાજકોટ) ને ઝડપી પાડવા માટે ચક્રો ગતિમાન કર્યા છે. બંને આરોપીઓ વિરુદ્ધ સાયલા પોલીસ સ્ટેશનમાં ગુનો દાખલ કરીને આગળની કાનૂની કાર્યવાહી હાથ ધરવામાં આવી છે.

કાયદો અને વ્યવસ્થા

રાજ્યમાં ગેરકાયદેસર પ્રવૃત્તિઓ અને બુટલેગરોના નેટવર્કને નેસ્તનાબૂદ કરવા માટે પોલીસ તંત્રની આ પ્રકારની સક્રિયતા અને બાતમી આધારિત દરોડા અત્યંત પ્રશંસનીય છે.