Loading Please Wait !!!
સુરત-બિલીમોરા સેક્શનમાં વીસ નવેમ્બરથી પાવર એક્ટિવેશન શરૂ!

બુલેટ ટ્રેન પ્રોજેક્ટ માટે ઓવરહેડ ઇલેક્ટ્રિફિકેશન સિસ્ટમ તૈયાર!

પચ્ચીસ હજાર વોલ્ટ અઈ ટ્રેક્શન સિસ્ટમથી લાઈનો ચાર્જ થશે!

ટ્રેક્શન લાઈનો જીવંત થતાં તંત્ર દ્વારા સાવચેતીની ચેતવણી!

સિટી ન્યુઝ @ નવી દિલ્હી

ભારતના અત્યંત મહત્ત્વાકાંક્ષી મુંબઈ-અમદાવાદ હાઇ-સ્પીડ રેલ કોરિડોર (બુલેટ ટ્રેન પ્રોજેક્ટ) અંતર્ગત સુરત અને બિલીમોરા વચ્ચેના એલિવેટેડ સેક્શનમાં વીજળી પુરવઠો શરૂ કરવાની પ્રક્રિયા આગામી ૨૦ નવેમ્બરથી તબક્કાવાર શરૂ કરવામાં આવનાર છે.

નેશનલ હાઇ-સ્પીડ રેલ કોર્પોરેશન લિમિટેડ (NHSRCL) દ્વારા આ પ્રોજેક્ટ માટે એક મોટું સીમાચિહ્ન સર કરવામાં આવ્યું છે, જેમાં ૨૫,૦૦૦-વોલ્ટ અઈ ટ્રેક્શન સિસ્ટમ દ્વારા ઓવરહેડ સાધનોને ચાર્જ કરવામાં આવશે અને ટ્રેનને ૩૨૦ કિમી/કલાકની ગતિ પૂરી પાડવા તૈયારીઓ પૂર્ણ કરાઈ છે.

આ જાહેરાત બાદ સુરક્ષા અધિકારીઓ અને એનએચએસઆરસીએલ દ્વારા આસપાસના રહેવાસીઓ તથા સામાન્ય જનતા માટે વિશેષ ચેતવણી જારી કરાઈ છે કે ૨૦ નવેમ્બર પછી ઓવરહેડ ટ્રેક્શન લાઈનોને જીવંત ગણવામાં આવશે, જેથી કોઈપણ અનધિકૃત વ્યક્તિએ તેની નજીક જવું નહીં.

વિશ્વની સૌથી અત્યાધુનિક ઓવરહેડ ટ્રેક્શન સિસ્ટમ ટ્રેનના પેન્ટોગ્રાફ દ્વારા હાઇ-સ્પીડ દોડ દરમિયાન પણ સ્થિર અને અવિરત વીજ પુરવઠો સુનિશ્ચિત કરશે, જેથી સપ્લાયમાં કોઈ ખલેલ કે સ્પાર્ક જેવી સમસ્યાઓ ઊભી થશે નહીં.

આ સમગ્ર પ્રોજેક્ટ માટે રાષ્ટ્રીય પાવર ગ્રીડમાંથી વીજળી પૂરી પાડવા માટે કુલ ૧૪ ટ્રેક્શન સબ-સ્ટેશન (TSS) બનાવવામાં આવ્યા છે, જેમાંથી વાપી, સુરત, ભરૂચ, વડોદરા અને બિલીમોરા ડેપો સહિતના ૯ સબ-સ્ટેશન ગુજરાતમાં કાર્યરત રહેશે.

હાઇ-સ્પીડ રેલ અને વીજ સુરક્ષાના ધોરણો

અત્યાધુનિક રેલવે પ્રોજેક્ટ્સમાં હાઈ-વોલ્ટેજ ઓવરહેડ ટ્રેક્શન સિસ્ટમ્સ અતિશય જોખમી અને જીવંત હોય છે. પ્રશાસન દ્વારા જારી કરાતી ચેતવણીઓનું પાલન કરવું અને ટ્રેક આસપાસ સાવધાની રાખવી નાગરિકોની સલામતી માટે અત્યંત અનિવાર્ય છે.