જૂનાગઢમાં લીલી પરિક્રમા પહેલા એસઓજીનો મોટો સપાટો!
- ચૌદ લાખથી વધુના ગાંજા સાથે ત્રણ શખ્સ ઝડપાયા!
- અલ્ટો કારમાં ગાંજાના પાર્સલ સગેવગે કરતા પકડાયા!
- સોળ લાખથી વધુનો મુદ્દામાલ પોલીસ દ્વારા જપ્ત!
સિટી ન્યુઝ @ જૂનાગઢ
આગામી સમયમાં યોજાનારી પવિત્ર ગિરનારની લીલી પરિક્રમાને ધ્યાનમાં રાખીને જૂનાગઢ એસઓજી (SOG) ની ટીમે શહેરમાં નશાનો કારોબાર ફેલાતો અટકાવવા માટે એક મોટી કાર્યવાહી કરી છે, જેમાં ૨૯.૬૩ કિલોગ્રામ ગાંજા સાથે ત્રણ શખ્સોને ઝડપી પાડવામાં આવ્યા છે.
મળતી માહિતી મુજબ, એસઓજીની ટીમે ચોક્કસ બાતમીના આધારે ૬૬ કે.વી. થી ખામધ્રોળ તરફ જતા રોડ પર દરોડો પાડીને અલ્ટો કારમાં સવાર શખ્સો પાસેથી આશરે ૧૪.૮૧ લાખ રૂપિયાની કિંમતનો ૨૯.૬૩ કિલો ગાંજો કબજે કર્યો છે.
મુખ્ય આરોપી આમીર અલીભાઈ મકરાણી દ્વારા ગેરકાયદેસર રીતે મંગાવવામાં આવેલા આ જથ્થાને વારીસખાન પઠાણના ઘરે સાચવવા રખાયો હતો અને રાત્રિના સમયે કારમાં ૧૫ પાર્સલ ભરીને સગેવગે કરવા નીકળેલા ઈલ્યાસ મકરાણી, ઈમ્તિયાઝ સમા અને વારીસખાન પઠાણ રંગેહાથ ઝડપાઈ ગયા હતા.
પોલીસે સ્થળ પરથી ગાંજા ઉપરાંત કાર અને મોબાઈલ ફોન સહિત કુલ રૂ. ૧૬,૧૨,૮૫૦ નો મુદ્દામાલ જપ્ત કરીને ત્રણેય આરોપીઓની કાયદેસરની અટકાયત કરી છે.
આ ગુનામાં સંડોવાયેલા મુખ્ય સૂત્રધાર આમીર અલીભાઈ મકરાણી સહિત અન્ય વોન્ટેડ આરોપીઓને ઝડપી પાડવા માટે પોલીસ દ્વારા ચક્રો ગતિમાન કરવામાં આવ્યા છે અને કડક પૂછપરછ હાથ ધરી છે.
ધાર્મિક ઉત્સવો અને નશા વિરોધી પોલીસ સઘન કાર્યવાહી
ગિરનારની લીલી પરિક્રમા જેવા લાખો શ્રદ્ધાળુઓની ભીડભાડવાળા પવિત્ર ધાર્મિક ઉત્સવો ટાણે અસામાજિક તત્વો દ્વારા ફેલાવાતા નશાના કારોબારો સામે પોલીસની આ પ્રકારની સક્રિયતા અને કડક કાર્યવાહી યુવાધનને બરબાદ થતું અટકાવવા માટે અત્યંત આવશ્યક છે.