સિટી ન્યુઝ @ ભાવનગર

ભાવનગર શહેરના નિલમબાગ પોલીસ સ્ટેશનના જવાનો પેટ્રોલિંગમાં હતા તે દરમિયાન મળેલી ચોક્કસ બાતમીના આધારે અલકા ટોકીઝ વિસ્તારમાં દરોડો પાડવામાં આવ્યો હતો. અલકા ટોકીઝ નજીક આવેલા બોડીયા મહાદેવના ખાંચા પાસે, અલીફ પ્લાઝાની સામે આવેલી ખુલ્લી જાહેર જગ્યામાં હારજીતનો જુગાર રમાતો હોવાની વિગતો પોલીસને મળી હતી. આ બાતમીના આધારે પોલીસે રેડ કરતા ત્યાં ગોળ કુંડાળું વળીને પૈસા તથા પાના વડે તીન પત્તીનો જુગાર રમતા સાત શખસો રંગે હાથ ઝડપાઈ ગયા હતા.

પોલીસે સ્થળ પરથી જે શખસોને ઝડપ્યા છે તેમાં મહમદ સુલ્તાનભાઈ શેખ, મહેક જીતુભાઇ પરમાર, શૈલેષ રાજુભાઇ ડાભી, સુરેશ હસમુખભાઈ વાજા, અફઝલ અબ્દુલરહેમાનભાઈ ખોખર, જાહિદ હુસેનભાઈ ખંભાતી અને ઇમ્તિયાઝ કરીમભાઇ કાઝીનો સમાવેશ થાય છે. આ તમામ શખસો ભાવનગરના રહેવાસી હોવાનું પ્રાથમિક તપાસમાં બહાર આવ્યું છે.

પોલીસે રેડ દરમિયાન જુગારના સાહિત્ય તરીકે ગંજીપત્તાના પાના તથા કુલ રોકડ રકમ ₹22,800 કબજે કરી હતી. ઝડપાયેલા તમામ સાત શખસો વિરુદ્ધ નિલમબાગ પોલીસ મથકમાં જુગારધારા એક્ટની કલમ 12 મુજબ ગુનો દાખલ કરવામાં આવ્યો છે. પોલીસે તમામ મુદ્દામાલ જપ્ત કરી કાયદેસરની ધરપકડ કરી આગળની તપાસ હાથ ધરી છે.

શહેરમાં જાહેર જગ્યાઓ પર ચાલતી આવી ગેરકાયદે પ્રવૃત્તિઓ ડામવા માટે પોલીસ દ્વારા પેટ્રોલિંગ સઘન બનાવવામાં આવ્યું છે. બાતમીદારોની મદદથી પોલીસ આવી પ્રવૃત્તિઓ પર નજર રાખી રહી છે. આ કાર્યવાહીને પગલે જુગારી તત્વોમાં ફફડાટ વ્યાપી ગયો છે. પોલીસે નાગરિકોને પણ અપીલ કરી છે કે તેમની આસપાસ આવી કોઈ શંકાસ્પદ પ્રવૃત્તિ થતી જણાય તો તાત્કાલિક પોલીસને જાણ કરવી.