સિટી ન્યુઝ @ લાલપુર (જામનગર)

જામનગર જિલ્લાના લાલપુર તાલુકાના પીપળી ગામના પ્રફુલ પુંજાભાઈ ટોયટા ઉર્ફે કાનજી સામે પાસા (PASA) હેઠળ કાયદેસરની કાર્યવાહી કરવામાં આવી છે. શરીર સંબંધી ગંભીર ગુનાઓમાં સંડોવણી સામે આવ્યા બાદ પોલીસ દ્વારા આ કડક પગલું ભરીને તેને સુરતની લાજપોર જેલમાં મોકલી આપવામાં આવ્યો છે.

પ્રાપ્ત વિગતો અનુસાર, પ્રફુલ ટોયટા સામે અગાઉ શરીર સંબંધી ગુનાઓ નોંધાયા હતા. આ ગુનાહિત પ્રવૃત્તિઓને ધ્યાનમાં રાખીને એલ.સી.બી. (LCB) ના પી.આઈ. વી.બી. ચૌધરી અને લાલપુર પોલીસ સ્ટેશનના પી.આઈ. કે.એલ. ગરચર દ્વારા તેની સામે પાસા હેઠળ કાર્યવાહી કરવા માટે એક વિસ્તૃત દરખાસ્ત તૈયાર કરવામાં આવી હતી. આ દરખાસ્ત જિલ્લા મેજિસ્ટ્રેટ સમક્ષ રજૂ કરવામાં આવી હતી.

જિલ્લા મેજિસ્ટ્રેટે આ દરખાસ્તને મંજૂરી આપતા જ એલ.સી.બી.ની ટીમે ગઈકાલે પ્રફુલ ટોયટાની અટકાયત કરી હતી. ધરપકડ બાદની તમામ કાયદેસરની પ્રક્રિયાઓ પૂર્ણ કરીને તેને સુરતની લાજપોર જેલના હવાલે કરી દેવામાં આવ્યો છે. પોલીસની આ કાર્યવાહીથી સ્થાનિક ગુનાહિત તત્વોમાં ફફડાટ વ્યાપી ગયો છે. જિલ્લા પોલીસ દ્વારા અસામાજિક તત્વો સામે આ પ્રકારની ઝુંબેશ આગામી સમયમાં પણ જારી રાખવામાં આવશે તેમ મનાય છે.