• એક વર્ષ પહેલાંની મારામારીની દાઝ રાખી ચાર શખ્સોએ મચાવ્યો આતંક - ગંગાજળિયા પોલીસ સ્ટેશનમાં નોંધાઈ ફરિયાદ
• મિત્રો સાથે બેઠેલા યુવક પર હુમલાનો પ્રયાસ - જર્મન અને વિજય ઉર્ફે વિજયા કાળિયા સહિત 4 સામે ગુનો દાખલ
• મોટરસાઇકલ પર સવાર થઈને આવેલા શખ્સોએ આપી જાનથી મારી નાખવાની ધમકી - અબદલ્લા બાજુબેરે નોંધાવી ફરિયાદ

ભાવનગર શહેરના સંવેદનશીલ ગણાતા રાણીકા વિસ્તારમાં જૂની અદાવતે ફરી એકવાર માથું ઊંચક્યું છે. એક વર્ષ પહેલાં થયેલી મારામારીની દાઝ રાખીને ગત રાત્રે ચાર શખ્સોએ ઘાતક હથિયારો સાથે એક યુવક અને તેના મિત્રો પર આતંક ફેલાવ્યો હતો. આ મામલે ગંગાજળિયા પોલીસે ચાર શખ્સો વિરુદ્ધ ગુનો નોંધી તેમની ધરપકડ માટે ચક્રો ગતિમાન કર્યા છે.

મિત્રો સાથે બેઠા હતા ને ત્રાટક્યા શખ્સો મળતી વિગતો મુજબ, આરબવાડમાં રહેતા અબદલ્લા બાજુબેર ગત રાત્રે આશરે એક વાગ્યાના સુમારે રાણીકા લીમડીવાળી સડક પર વખારના ચોક પાસે પોતાના મિત્રો સાથે બેઠા હતા. આ દરમિયાન જર્મન અને વિજય ઉર્ફે વિજયો કાળીયો તેમના અન્ય બે સાથીદારો સાથે મોટરસાઇકલ પર ત્યાં ધસી આવ્યા હતા. આરોપીઓના હાથમાં ધારિયું અને છરી જેવા ઘાતક હથિયારો જોઈને ત્યાં બેઠેલા યુવકોમાં ફફડાટ વ્યાપી ગયો હતો.

"હવા કાઢી નાખીશું" કહી આપી ધમકી આરોપીઓએ જૂની અદાવત કાઢી અબદલ્લાને ગાળો આપતા કહ્યું હતું કે, "તમને બહુ હવા આવી ગઈ છે, અમે તમારી હવા કાઢી નાખીશું." એટલું જ નહીં, આરોપીઓએ એવી પણ ધમકી આપી હતી કે જો તેઓ તેમના લતાની બહાર ક્યાંય પણ જોવા મળશે, તો તેમને જીવતા રહેવા દેવામાં આવશે નહીં. આ પ્રકારના હિંસક નિવેદનો બાદ આરોપીઓ ત્યાંથી ફરાર થઈ ગયા હતા.

ગંગાજળિયા પોલીસની કડક કાર્યવાહી આ ઘટના બાદ ગભરાયેલા અબદલ્લાએ ગંગાજળિયા પોલીસ સ્ટેશનમાં ફરિયાદ નોંધાવી હતી. પોલીસે ત્વરિત કાર્યવાહી કરતા આરોપી જર્મન, વિજય, અમન ઉર્ફે બગ્ગો અને એક અજાણ્યા શખ્સ સામે નવા કાયદા (BNS) ની કલમો હેઠળ ગુનો દાખલ કર્યો છે. શહેરમાં કાયદો અને વ્યવસ્થા જળવાઈ રહે તે માટે પોલીસ હવે આ શખ્સોની સઘન શોધખોળ કરી રહી છે.