સિટી ન્યુઝ @ નવી દિલ્હી

ઈરાનના કારણે સર્જાયેલી ક્રુડ-ગેસના ભાવવધારા તથા પુરવઠાની વૈશ્વિક સમસ્યા વચ્ચે સરકાર દ્વારા સામાન્ય નાગરિકો અને ગ્રાહકો માટે કેટલાક મહત્વપૂર્ણ નિયમોમાં ફેરફાર કરવામાં આવ્યા છે. જે વિસ્તારોમાં પાઈપલાઈન એટલે કે પીએનજી (PNG) ગેસની સુવિધા ઉપલબ્ધ હોય ત્યાં પાઈપલાઈન મારફત જ ગેસ સેવા લેવાનું ફરજિયાત બનાવવામાં આવ્યું છે અને તેનો તબક્કાવાર અમલ શરૂ થઈ ગયો છે.

ભૂતિયા અને ખોટા કનેક્શનો કાયમી ધોરણે બંધ કરાવવા માટે સરકારે નવેસરથી કેવાયસી (KYC) પ્રક્રિયા પણ ફરજિયાત બનાવી છે, જેને નાગરિકો મોબાઈલ એપ મારફત સરળતાથી ઘર બેઠા કરી શકે છે. આ વ્યવસ્થાને વધુ પારદર્શક બનાવવા માટે રાંધણગેસ ડિલિવરી સમયે રજિસ્ટર્ડ મોબાઈલ નંબર પર એક ઓટીપી (OTP) મોકલવામાં આવશે, જે ડિલિવરીમેન સાથે શેર કરવાનો રહેશે.

ડિલિવરીમેન પોતાના મોબાઈલ પર આ ઓટીપી દાખલ કરીને સાચા ગ્રાહકને જ ગેસ સિલિન્ડરની ડિલિવરી થઈ છે તેની ખાતરી કરશે, જેથી કોઈ ભૂતિયા કનેક્શનમાં સિલિન્ડર ન જાય અને કોઈ અન્ય વ્યક્તિને ગેસ ન આપી શકાય. આ નવી અને કડક વ્યવસ્થાથી ગેસ વિતરણમાં થતી ગેરરીતિઓ પર મોટો અંકુશ આવી શકશે અને ચોક્કસ ગ્રાહકો સુધી જ સબસિડી કે પુરવઠો પહોંચશે.

આ ઉપરાંત અન્ય નાણાકીય ક્ષેત્રોમાં પણ મહત્વના બદલાવ આવ્યા છે, જેમાં નેશનલ પેન્શન સિસ્ટમ (NPS) અને એનપીએસ લાઈટ પર પોઈન્ટ ઓફ પ્રેઝન્સ (POP) ના ચાર્જમાં ફેરફાર કરાયა છે. સામાન્ય યોજના અને મલ્ટીપલ યોજના વચ્ચેનો તફાવત દૂર કરીને રજિસ્ટ્રેશન માટે એક વખતનો રૂા.200 નો ચાર્જ અને દર ત્રણ મહિને રૂા.50 નો ચાર્જ તેમજ એસેટ્સ અન્ડર મેનેજમેન્ટ માટે 0.20 ટકા ચાર્જ વસૂલવામાં આવશે.

બેન્કિંગ સેક્ટરમાં પણ એટીએમ મારફત રોકડ ઉપાડવા માટે સ્ટેટ બેંક સહિતની બેંકોએ મર્યાદા નક્કી કરી છે, જેમાં હવે એટીએમમાં માત્ર 4 વ્યવહાર જ મફત રહેશે અને બાકીના વ્યવહારો પર રૂા.15 તેમજ જીએસટી વસૂલાશે. પગારદાર વર્ગ અને સામાન્ય ગ્રાહકો માટે મફત લેવડદેવડની મર્યાદા બદલાવાથી નાણાકીય આયોજન વધુ સાવચેતીપૂર્વક કરવું પડશે.

નાણાકીય નિયમો અને પારદર્શક વિતરણ વ્યવસ્થા

સરકારી યોજનાઓ અને બળતણ વિતરણમાં પારદર્શિતા લાવવા માટે લેવાતા પગલાં ભ્રષ્ટાચાર અટકાવવામાં મદદરૂપ બને છે. ગ્રાહકોએ બદલાતા નિયમો અને ડિજિટલ પ્રક્રિયાઓથી માહિતગાર રહીને સુરક્ષિત અને સમયસર વ્યવહારો કરવા અનિવાર્ય છે.