• પત્નીને ટિકિટ મળતા પતિ નારાજ – કેશોદ વોર્ડ-5 માં ભાજપના પૂર્વ સભ્યનો ચૂંટણી લડવાનો ઇનકાર
• ભેસાણ બેઠક પર જામશે ખરાખરીનો જંગ – ગોપાલ ઇટાલિયાના ગઢમાં ગાબડું પાડવા ભાજપે ભાયાણીને ઉતાર્યા
• માળિયા હાટીનામાં સાંસદ અને ધારાસભ્યની આગેવાનીમાં મહારેલી – ફોર્મ ભરવાના અંતિમ દિવસે ભારે ઘસારો

ગુજરાત સ્થાનિક સ્વરાજની ચૂંટણી માટે ફોર્મ ભરવાના અંતિમ દિવસે જૂનાગઢ જિલ્લામાં રાજકીય ગરમાવો જોવા મળ્યો છે. સત્તાધારી ભાજપ માટે એક તરફ શક્તિ પ્રદર્શનનો દિવસ રહ્યો, તો બીજી તરફ આંતરિક નારાજગી અને પક્ષપલટાએ ચિંતા વધારી છે. ખાસ કરીને કેશોદ અને ભેસાણ બેઠકો પર સર્જાયેલા નવા સમીકરણોએ રાજકીય પંડિતોને પણ વિચારતા કરી દીધા છે.

કેશોદમાં ભાજપના મહિલા મોરચાના પૂર્વ ઉપપ્રમુખ શારદાબેન રાખલીયાએ પક્ષ સાથે છેડો ફાડી આમ આદમી પાર્ટી (AAP) નો ખેસ ધારણ કરી લીધો છે. 2009 થી ભાજપમાં સક્રિય રહેલા શારદાબેને આક્ષેપ કર્યો કે 15 વર્ષની નિષ્ઠાવાન મહેનત છતાં પાર્ટીએ તેમની કદર કરી નથી. તેઓ હવે વોર્ડ-1 માંથી 'આપ' ની પેનલ સાથે ચૂંટણી જંગમાં ઉતરશે, જે ભાજપની મહિલા વોટબેંકમાં ગાબડું પાડી શકે છે.

પતિ-પત્નીના વિવાદમાં ભાજપ ફસાયું: કેશોદ નગરપાલિકાના વોર્ડ નં. 5 માં એક અનોખી સ્થિતિ સર્જાઈ છે. ભાજપના પૂર્વ સભ્ય વિવેક કોટડીયાએ ટિકિટ માંગી હતી, પરંતુ પક્ષે તેમના બદલે તેમની પત્નીને ઉમેદવાર બનાવ્યા. આ નિર્ણયથી નારાજ થઈને વિવેકભાઈએ પત્ની વતી પણ ચૂંટણી લડવાની ના પાડી દેતા ભાજપને છેલ્લી ઘડીએ નવા ઉમેદવારની શોધ કરવી પડી છે.

બીજી તરફ, ભેસાણ જિલ્લા પંચાયતની બેઠક પર ભાજપે પૂર્વ ધારાસભ્ય ભૂપત ભાયાણીને મેદાનમાં ઉતારીને 'આપ' ને વળતો પ્રહાર કર્યો છે. આ બેઠક ગોપાલ ઇટાલિયાના મતવિસ્તારમાં આવતી હોવાથી ભાજપ અહીં જીતવા માટે એડીચોટીનું જોર લગાવી રહ્યું છે. માળિયા હાટીનામાં સાંસદ રાજેશ ચુડાસમાની આગેવાનીમાં યોજાયેલી રેલીએ ભાજપના કાર્યકરોમાં જોશ પૂર્યો છે. હવે જોવાનું એ રહેશે કે ભાજપનો આંતરિક અસંતોષ અને 'આપ' ની વધતી સક્રિયતા જૂનાગઢના પરિણામોમાં શું નવો વળાંક લાવે છે.