સિટી ન્યુઝ @ નવી દિલ્હી

રાજધાની દિલ્હીના ચાણક્યપુરી સ્થિત પાકિસ્તાન હાઈ કમિશન પરિસરની બહાર બુધવારે મોડી રાત્રે સ્થાનિક સત્તાવાળાઓ દ્વારા બુલડોઝર ફેરવીને મોટા પાયે ડિમોલિશનની કાર્યવાહી હાથ ધરવામાં આવી હતી. સત્તાવાર સૂત્રોના જણાવ્યા અનુસાર, હાઈ કમિશનની નિર્ધારિત કાયદેસર હદ બહાર ઊભા કરવામાં આવેલા ગેરકાયદેસર અને બિનઅધિકૃત બાંધકામોને તાત્કાલિક ધોરણે તોડી પાડવામાં આવ્યા છે.

શાંતિપથ પર આવેલી પાકિસ્તાની હાઈ કમિશન ઓફિસ બહાર કરવામાં આવેલી આ કામગીરી દરમિયાન સુરક્ષા બેરિકેડ્સ, લોખંડની ફેન્સિંગ અને વિઝા મેળવવા માટે આવતા મુલાકાતીઓને કતારમાં ઊભા રાખવા બનાવેલા શેડ તેમજ માળખાં સંપૂર્ણપણે હટાવી લેવામાં આવ્યા હતા. ઘટનાસ્થળ પર લોખંડના તૂટેલા એંગલ, પતરાં, ગેટ અને કોંક્રિટનો કાટમાળ વિખરાયેલો જોવા મળ્યો હતો, જોકે મુખ્ય બિલ્ડિંગ અને મુખ્ય પ્રવેશ દ્વાર સુરક્ષિત રહ્યા છે.

આ કાર્યવાહી 2 દિવસ અગાઉ પાકિસ્તાનના ઈસ્લામાબાદ ખાતે આવેલા ભારતીય હાઈ કમિશન બહાર કરવામાં આવેલી કાર્યવાહીનો સીધો વળતો જવાબ માનવામાં આવે છે. પાકિસ્તાની વહીવટી તંત્ર દ્વારા ઈસ્લામાબાદમાં ભારતીય મિશનની બહાર સુરક્ષા હેતુસર લગાવવામાં આવેલા બેરિકેડ્સ અને પાર્કિંગ પોલ હટાવી દેવામાં આવ્યા હતા, જેના માત્ર 3 જ દિવસની અંદર ભારતે સમાન વળતું પગલું ભર્યું છે.

બંને દેશો વચ્ચે રાજદ્વારી સ્તરે કાશ્મીરના મુદ્દે પણ તણાવમાં વધારો થયો છે. અમેરિકી રાજદૂત સર્જિયો ગોરે 19 August ના રોજ શ્રીનગર પ્રવાસ દરમિયાન જમ્મુ-કાશ્મીરને ભારતનો અભિન્ન અને મહત્વપૂર્ણ ભાગ ગણાવ્યો હતો. પાકિસ્તાને આ નિવેદન સામે આકરો વિરોધ નોંધાવી ઈસ્લામાબાદમાં અમેરિકી પ્રતિનિધિ નતાલી બેકરને બોલાવીને સત્તાવાર નારાજગી વ્યક્ત કરી હતી.

ઉલ્લેખનીય છે કે ભારત અને પાકિસ્તાન બંને 56 સભ્યો ધરાવતા કોમનવેલ્થ સંગઠનના સભ્ય દેશો હોવાથી બંને દેશોમાં સ્થિત રાજદ્વારી મિશનોને પરંપરાગત રીતે 'એમ્બેસી'ને બદલે 'હાઈ કમિશન' તરીકે ઓળખવામાં આવે છે. છેલ્લા કેટલાક દિવસોથી બંને દેશો વચ્ચે સર્જાયેલા આ શ્રેણીબદ્ધ રાજદ્વારી ઘર્ષણથી સંબંધોમાં ફરી એકવાર ભારે તણાવ જોવા મળી રહ્યો છે.

પાક હાઈ કમિશન બહાર બુલડોઝર ચાલ્યું

દિલ્હીના ચાણક્યપુરીમાં પાકિસ્તાન હાઈ કમિશનની હદ બહાર બનેલા ગેરકાયદે બાંધકામો અને વિઝા ફેન્સિંગ પર બુલડોઝર ફેરવી દેવાયું છે. 2 દિવસ પહેલાં ઈસ્લામાબાદમાં ભારતીય હાઈ કમિશન બહારના બેરિકેડ હટાવાયા હતા, જેના વળતા જવાબરૂપે આ પગલું લેવાયું છે. મુખ્ય બિલ્ડિંગ સિવાય બહારના ભાગનું દબાણ સંપૂર્ણ દૂર કરાયું છે.