• ગાંધીનગર પોલીસ ભવનમાં ઉમળકાભેર સ્વાગત, અમદાવાદ CPનો ચાર્જ પણ રહેશે યથાવત્
• નવી જવાબદારી સાથે અમદાવાદ પોલીસ કમિશનરની વધારાની જવાબદારી પણ સંભાળશે
• ગાંધીનગરમાં ભવ્ય સ્વાગત, સાયબર ક્રાઈમ અને સુરક્ષા પર રહેશે વિશેષ ફોકસ

સિટી ન્યુઝ @ ગાંધીનગર

ગુજરાત પોલીસને લાંબા સમય બાદ નવા કાયમી પોલીસ મહાનિર્દેશક (DGP) મળ્યા છે. ૧૯૯૩ બેચના વરિષ્ઠ IPS અધિકારી જ્ઞાનેન્દ્ર સિંહ (જી. એસ.) મલિકે સોમવારે ગાંધીનગર સ્થિત પોલીસ ભવન ખાતે રાજ્યના પોલીસ વડા તરીકે સત્તાવાર રીતે ચાર્જ સંભાળી લીધો છે. જ્યારે તેઓ કાર્યભાર ગ્રહણ કરવા પહોંચ્યા ત્યારે રાજ્ય પોલીસના અનેક વરિષ્ઠ અધિકારીઓએ ઉપસ્થિત રહી તેમનું ભવ્ય સ્વાગત કર્યું હતું.

જી. એસ. મલિક પાસે હાલમાં અમદાવાદ શહેર પોલીસ કમિશનરનો ચાર્જ પણ યથાવત્ રહેશે. સોમવારે સવારે તેમણે અમદાવાદ કમિશનર કચેરી ખાતે મહત્વની બેઠક યોજ્યા બાદ ગાંધીનગર પ્રસ્થાન કર્યું હતું. જ્યાં સુધી સરકાર દ્વારા નવા અમદાવાદ પોલીસ કમિશનરની સત્તાવાર નિમણૂક કરવામાં ન આવે, ત્યાં સુધી આ વધારાનો ચાર્જ DGP મલિક સંભાળતા રહેશે. પોલીસ બેડામાં તેઓ એક કડક વહીવટકર્તા અને શિસ્તબદ્ધ અધિકારી તરીકે જાણીતા છે.

વર્તમાન સમયમાં સાયબર ગુનાઓ, સંગઠિત ગુનાખોરી અને આંતરિક સુરક્ષા જેવા વિવિધ પડકારો વચ્ચે DGP તરીકેની આ નિમણૂક ખૂબ મહત્વની માનવામાં આવે છે. પદભાર સંભાળ્યા બાદ હવે આગામી દિવસોમાં તેમના નેતૃત્વ હેઠળ ગુજરાત પોલીસ વધુ સ્માર્ટ, ટેક્નોલોજી આધારિત અને જનકેન્દ્રિત પોલીસિંગ તરફ આગળ વધે તેવી આશા વ્યક્ત કરવામાં આવી રહી છે. કેન્દ્ર અને રાજ્ય સરકારનો બહોળો અનુભવ ધરાવતા મલિકના નેતૃત્વમાં ગુજરાત પોલીસ વધુ સક્ષમ બનશે તેવો વિશ્વાસ વ્યક્ત કરાયો છે.

બોક્સ મેટર: સુરક્ષા અને સુધારા પર નજર

રાજ્યના નવા DGP જી. એસ. મલિકની પ્રાથમિકતાઓમાં સાયબર ક્રાઈમનું નિયંત્રણ અને ટેક્નોલોજી આધારિત સ્માર્ટ પોલીસિંગ મુખ્ય રહેશે. રાજ્યમાં વધી રહેલી ગુનાખોરીને ડામવા અને સુરક્ષા વ્યવસ્થાને વધુ સુદ્રઢ બનાવવા માટે તેઓ પોતાની વ્યૂહાત્મક આવડતનો ઉપયોગ કરશે. પોલીસ દળમાં શિસ્ત અને નાગરિકો સાથેના મૈત્રીપૂર્ણ સંબંધોને વધુ મજબૂત બનાવવા માટે તેમના અનુભવનો ગુજરાત પોલીસને મોટો લાભ મળશે તેવી અપેક્ષા રાખવામાં આવી રહી છે.