• પેરોલ ફર્લોની ટીમે મોબાઈલ કબ્જે કરી ઓનલાઈન સટ્ટાના મોટા રેકેટનો પર્દાફાશ કર્યો – ઉમરાળાનો વતની પોલીસ સકંજામાં
• સુરત, રાજકોટ અને ભાવનગરના બુકીઓના નામો ખુલ્યા – નિલમબાગ પોલીસ મથકે 6 આરોપીઓ વિરુદ્ધ જુગારધારા હેઠળ કાર્યવાહી
• માસ્ટર આઈડી દ્વારા રમાતો હતો કરોડોનો જુગાર – પેરોલ ફર્લો સ્ક્વોડે બાતમીના આધારે રાકેશને રંગેહાથ પકડ્યો

આઈપીએલ (IPL) ૨૦૨૬ની સીઝન શરૂ થતાની સાથે જ સટ્ટાખોરો સક્રિય થયા છે, ત્યારે ભાવનગર પેરોલ ફર્લો સ્ક્વોડની ટીમે શહેરમાં પેટ્રોલિંગ દરમિયાન એક મોટા ઓનલાઈન સટ્ટા રેકેટનો પર્દાફાશ કર્યો છે. ભાવનગર મ્યુનિસિપલ કોર્પોરેશન (BMC) ની કચેરી સામે સરેઆમ મોબાઈલ દ્વારા સટ્ટો રમાડતા એક શખ્સની ધરપકડ કરી કુલ ૬ શખ્સો વિરુદ્ધ નિલમબાગ પોલીસ મથકમાં ગુનો નોંધવામાં આવ્યો છે. આ નેટવર્ક માત્ર ભાવનગર પૂરતું મર્યાદિત નથી, પરંતુ તેના તાર રાજકોટ અને સુરત સુધી જોડાયેલા હોવાનું સામે આવ્યું છે.

પેરોલ ફર્લો સ્ક્વોડની ટીમ જ્યારે શહેરના નિલમબાગ વિસ્તારમાં પેટ્રોલિંગ કરી રહી હતી, ત્યારે તેમને ચોક્કસ માહિતી મળી હતી કે એક શખ્સ બીએમસી કચેરી સામે ઉભો રહીને મોબાઈલ દ્વારા સટ્ટો રમાડી રહ્યો છે. પોલીસે સ્થળ પર પહોંચી ૫૩ વર્ષીય રાકેશ નરોત્તમદાસ ઉંડવીયાની અટકાયત કરી તેની અંગઝડતી કરી હતી. તપાસ દરમિયાન રાકેશના મોબાઈલમાંથી ઓનલાઈન સટ્ટાની એપ્લિકેશન મળી આવી હતી, જેનો ઉપયોગ તે આઈપીએલ મેચ પર હાર-જીતનો જુગાર રમાડવા માટે કરતો હતો.

પૂછપરછ દરમિયાન ચોંકાવનારા ખુલાસા થયા છે. રાકેશ માસ્ટર આઈડી ધરાવતો હતો અને જે લોકો સટ્ટો રમવા માંગતા હોય તેમને આઈડી અને ક્રેડિટ ફોરવર્ડ કરીને સટ્ટો રમાડતો હતો. આ કેસમાં પોલીસે સુરતના વિરલ વિરડીયા, કિરીટ ઉર્ફે કેસી શાહ અને રમેશ નામના શખ્સો ઉપરાંત રાજકોટના શુભમ કંધેડીયા અને ભાવનગરના દેવાંગ પટેલ તથા રોહિત ગોહેલના નામ પણ ખોલાવ્યા છે. પોલીસે રાકેશ પાસેથી મોબાઈલ કબ્જે કરીને તેની ધરપકડ કરી છે અને અન્ય પાંચ આરોપીઓને ઝડપી પાડવા ચક્રો ગતિમાન કર્યા છે.

નિલમબાગ પોલીસે તમામ ૬ શખ્સો વિરુદ્ધ જુગારધારાની કલમ ૧૨ મુજબ ગુનો નોંધી વધુ તપાસ હાથ ધરી છે. આઈપીએલ દરમિયાન યુવાધનને બરબાદ કરતા આવા ઓનલાઈન સટ્ટાખોરો સામે આગામી દિવસોમાં ભાવનગર પોલીસ વધુ કડક કાર્યવાહી કરે તેવી શક્યતા છે.