સિટી ન્યુઝ @ ગાંધીનગર

ગુજરાત સરકાર દ્વારા વહીવટી તંત્રને વધુ ગતિશીલ અને કાર્યક્ષમ બનાવવાના હેતુથી એક મહત્વપૂર્ણ અને કડક નિર્ણય લેવામાં આવ્યો છે. જે કર્મચારીઓ 55 વર્ષની વય વટાવી ચૂક્યા હોય અને જેમની કામગીરી સંતોષજનક જણાતી નથી, તેવા કર્મચારીઓને હવે સમય પહેલા નિવૃત્ત કરીને ‘પાણીચું’ પકડાવવાની તૈયારીઓ શરૂ કરી દેવામાં આવી છે. સરકાર દ્વારા એક સત્તાવાર પરિપત્ર જાહેર કરીને તમામ વિભાગો પાસેથી 55 વર્ષ પૂર્ણ કરનારા કર્મચારીઓની 11 મુદ્દાઓને આધારે વિગતવાર યાદી મંગાવવામાં આવી છે.

હિસાબ અને તિજોરી નિયામક કચેરી દ્વારા જારી કરાયેલા આદેશ અનુસાર, ગ્રુપ-1 થી લઈને ગ્રુપ-4 સુધીના તમામ સ્તરના કર્મચારીઓની માહિતી એકત્ર કરવામાં આવશે. ખાસ કરીને 1 ઓક્ટોબર 2026 થી 31 ડિસેમ્બર 2026 દરમિયાન 55 વર્ષની ઉંમર પૂરી કરતા હોય તેવા કર્મચારીઓ પર સરકારની વિશેષ નજર રહેશે. સરકાર આવા કર્મચારીઓના છેલ્લા કેટલાક વર્ષોના સર્વિસ રેકોર્ડ, ગુપ્ત અહેવાલો (ACR), શિસ્તભંગની કાર્યવાહી અને તેમની એકંદર કાર્યક્ષમતાનું ઊંડાણપૂર્વક મૂલ્યાંકન કરશે.

સરકારી સૂત્રોના જણાવ્યા મુજબ, આ પ્રક્રિયાનો મુખ્ય ઉદ્દેશ વહીવટી તંત્રમાં રહેલી બિનકાર્યક્ષમતાને દૂર કરવાનો અને કાર્યકારી ક્ષમતામાં વધારો કરવાનો છે. જે કર્મચારીઓની ફરજ પ્રત્યે બેદરકારી જણાશે અથવા જેમના વિરુદ્ધ ગંભીર શિસ્તભંગના કેસો હશે, તેમને ફરજિયાત નિવૃત્તિ આપીને ઘરે મોકલી દેવામાં આવશે. આ માટે નક્કી કરાયેલા 11 મુદ્દાઓમાં કર્મચારીની વર્તણૂકથી લઈને તેની ઉત્પાદકતા સુધીના તમામ પાસાઓને આવરી લેવામાં આવ્યા છે.

તમામ વિભાગોને આગામી 30 મે 2026 સુધીમાં આ ડેટા મોકલી આપવા માટે કડક સૂચના આપવામાં આવી છે. આ માહિતી મળ્યા બાદ ઉચ્ચસ્તરીય સમીક્ષા સમિતિ દ્વારા દરેક કેસની તપાસ કરવામાં આવશે અને નબળો રેકોર્ડ ધરાવતા કર્મચારીઓ સામે એક્શન લેવામાં આવશે. સરકારના આ આક્રમક વલણને કારણે સરકારી કચેરીઓમાં વર્ષોથી જામી ગયેલા અને નબળી કામગીરી કરનારા કર્મચારીઓમાં ભારે ફફડાટ વ્યાપી ગયો છે.

ઉલ્લેખનીય છે કે, વહીવટી તંત્રમાં નવી ઉર્જા લાવવા અને યુવાન પ્રતિભાઓને વધુ તક મળે તે હેતુથી સરકાર સમયાંતરે આવી સમીક્ષા કરતી હોય છે. જોકે, આ વખતે જે રીતે 11 મુદ્દાઓનો કડક અમલ કરવાની વાત છે તે જોતા આગામી સમયમાં મોટી સંખ્યામાં કર્મચારીઓ પર ગાજ પડે તેવી શક્યતા છે. સરકારના આ નિર્ણયથી વહીવટી પ્રક્રિયામાં પારદર્શિતા અને ઝડપ આવશે તેવો વિશ્વાસ વ્યક્ત કરવામાં આવી રહ્યો છે.