સિટી ન્યુઝ @ ગાંધીનગર

ગુજરાત સરકાર દ્વારા સચિવાલય અને મહેસૂલ વિભાગના વહીવટી સ્તરે એક ખૂબ જ મોટો ફેરબદલ કરવામાં આવ્યો છે. રાજ્ય સરકારના સામાન્ય વહીવટ વિભાગ (GAD) અને મહેસૂલ વિભાગ દ્વારા સંયુક્ત રીતે મોટાપાયે બદલી અને બઢતીના આદેશો જારી કરવામાં આવ્યા છે. 27 મે 2026 ના રોજ મોડીસાંજે જાહેર થયેલા આ વહીવટી આદેશો અનુસાર, રાજ્યભરમાં ફરજ બજાવતા ડેપ્યુટી કલેક્ટર, જિલ્લા પુરવઠા અધિકારી અને મામલતદાર કક્ષાના 27 અધિકારીઓની બદલી કરવામાં આવી છે, જ્યારે 9 અધિકારીઓને પ્રમોશન આપવામાં આવ્યું છે. આ અચાનક કરાયેલા ફેરફારથી સચિવાલય અને જિલ્લા કક્ષાના સરકારી તંત્રમાં ભારે હલચલ મચી ગઈ છે.

આ સાથે જ સચિવાલય કેડરના આંતરિક વહીવટી માળખાને વેગ આપવા માટે 36 સેક્શન અધિકારીઓ (SO) ની એકસાથે બદલી કરી દેવામાં આવી છે. આ શિફ્ટિંગની સાથે જ સચિવાલયના નીચલા સ્તરે લાંબા સમયથી ફરજ બજાવતા 81 નાયબ સેક્શન અધિકારીઓ (DYSO) ને સેક્શન અધિકારી તરીકે ઉચ્ચ પ્રમોશન આપીને નવી નિમણૂકો સોંપવામાં આવી છે. બીજી તરફ, મામલતદાર વર્ગ-2 સંવર્ગના 9 અધિકારીઓને સિનિયોરિટીના આધારે હંગામી ધોરણે ગુજરાત વહીવટી સેવા વર્ગ-1 માં બઢતી આપીને નાયબ કલેક્ટર કે સમાન કક્ષાની જગ્યાઓ પર મૂકવામાં આવ્યા છે.

ગાંધીનગર સચિવાલયમાં છેલ્લા કેટલાક મહિનાઓથી મહત્વના વહીવટી નિર્ણયો અને અધિકારીઓની બદલી-બઢતીના આદેશો ઓફિસ સમય બાદ એટલે કે મોડીરાત્રે જાહેર થવાનું ‘મિડનાઇટ ઓર્ડર કલ્ચર’ શરૂ થયું છે. વહીવટી વર્તુળોના જણાવ્યા મુજબ, બદલી જેવા સંવેદનશીલ મુદ્દાઓમાં સંપૂર્ણ ગોપનીયતા જાળવવા અને અંતિમ ક્ષણ સુધી થતા રાજકીય-વહીવટી ફેરફારોને કારણે મોડીરાત્રે ઓર્ડર જાહેર કરવાની પદ્ધતિ અપનાવવામાં આવી રહી છે. જોકે, આ મોટા વહીવટી ગંજીપા વચ્ચે સચિવાલયના અનેક નાયબ સેક્શન અધિકારીઓમાં પ્રમોશનની મર્યાદિત તકોને કારણે અસંતોષ અને નિરાશાની લાગણી પણ જોવા મળી રહી છે.

બદલી ઓર્ડરમાં મોડીરાત સુધી ચાલી કવાયત

સચિવાલયના વહીવટી નિર્ણયો હવે મોડીરાત્રે જાહેર થવાની પરંપરા સામાન્ય બની છે. ફાઈલ ક્લિયરન્સ અને નામોની આખરી ચર્ચાને કારણે સ્ટાફે રાત્રે મોડે સુધી બેસવું પડ્યું હતું. ટ્રાન્સફર અને પ્રમોશનના લિસ્ટમાં અંતિમ ક્ષણ સુધી ફેરફારો થતા હોવાનું ચર્ચાઈ રહ્યું છે. આગામી સમયમાં અન્ય વિભાગોમાં પણ આવા મિડનાઇટ ઓર્ડર થવાની સંભાવના સેવાઈ રહી છે.