દેશની હોસ્પિટલોમાં દર્દીઓ પાસેથી સારવાર, ટેસ્ટ, ઓપરેશન અને દવાઓના નામે અધધ નાણાં વસૂલવામાં આવતી હોવાની વાત હવે કોઈથી છુપી નથી રહી, અને કેન્દ્ર સરકારે પણ હવે સુપ્રીમ કોર્ટમાં આ બાબતની સત્તાવાર કબૂલાત કરી લીધી છે.

કેન્દ્ર સરકારના રસાયણ અને ખાતર મંત્રાલય દ્વારા દાખલ કરવામાં આવેલા એક મહત્વપૂર્ણ સોગંદનામામાં (એફિડેવિટ) જણાવવામાં આવ્યું છે કે સરકાર આ ગંભીર સમસ્યાથી સંપૂર્ણપણે માહિતગાર છે, તેની સઘન તપાસ કરી રહી છે અને તમામ હિતધારકો સાથે પરામર્શ કરીને યોગ્ય પગલાં ઉઠાવી રહી છે.

સોગંદનામામાં સ્પષ્ટ કરવામાં આવ્યું છે કે હોસ્પિટલો ફાર્મા કંપનીઓ પાસેથી એવી દવાઓ અને સામગ્રીઓ ખરીદે છે જે સૌથી વધુ ટ્રેડ માર્જીન આપે છે અને ત્યારબાદ દર્દીઓને ઊંચી MRP પર વેચે છે. એન્ટી કેન્સર દવાઓમાં આ માર્જીન 170 ટકાથી 700 ટકા કે તેથી વધુ હોઈ શકે છે.

સરકારે અદાલતમાં જણાવ્યું હતું કે તેણે અત્યાર સુધીમાં 9358 અનુસૂચિત ફોર્મ્યુલેશનની મહત્તમ કિંમતો અને 3881 જેટલી દવાઓની છૂટક કિંમતો નક્કી કરી છે. આ સોગંદનામું ડૉ. સંજય કુલશ્રેષ્ઠ દ્વારા દાખલ કરવામાં આવેલી અરજીના સંદર્ભમાં રજૂ કરવામાં આવ્યું હતું.

આ અરજીમાં નીતિ આયોગના રિપોર્ટ અને ભૂતકાળના નિવેદનોનો ઉલ્લેખ કરવામાં આવ્યો હતો કે કેવી રીતે દેશમાં વધતા સ્વાસ્થ્ય ખર્ચ અને મોંઘી સારવારના કારણે દર વર્ષે લગભગ 6 કરોડ પરિવારો ગરીબી રેખા નીચે ધકેલાઈ જવા મજબૂર બને છે.

હોસ્પિટલો દ્વારા દર્દીઓની લૂંટ અને સ્વાસ્થ્ય સંકટ

દેશની હોસ્પિટલો દ્વારા દવાઓ અને તબીબી ઉપકરણો પર વસૂલવામાં આવતું અસાધારણ માર્જીન સામાન્ય જનતાના ખિસ્સા પર મોટો આર્થિક બોજ બની ગયું છે. જ્યારે દર્દીઓ ગંભીર બીમારીઓ સામે લડી રહ્યા હોય ત્યારે હોસ્પિટલો અને ફાર્મસીઓ દ્વારા કરાતી આ નફાખોરી અત્યંત ચિંતાજનક છે. સરકારે આ મામલે કડક નિયંત્રણો લાદવા અનિવાર્ય છે જેથી ગરીબ અને મધ્યમ વર્ગના પરિવારોને રાહત મળી શકે અને સ્વાસ્થ્ય સેવાઓ ખરેખર સુલભ બની શકે.