તાલાલાના જસાપુરના ખેડૂત ચેતન મેંદપરાની કંપની દ્વારા ઓસ્ટ્રેલિયામાં પ્રથમ 800 બોક્સ કેરી મોકલવામાં આવી.

આ કન્સાઇનમેન્ટમાં 600 બોક્સ કેસર અને 200 બોક્સ હાફૂસ કેરીનો સમાવેશ થાય છે.

ઓસ્ટ્રેલિયામાં 3 કિલો કેરીના બોક્સની કિંમત આશરે 65 ઓસ્ટ્રેલિયન ડોલર બોલાઈ રહી છે.

ગીર પંથકની પ્રખ્યાત કેસર કેરીના ચાહકો માટે સારા સમાચાર છે. અમેરિકા બાદ હવે ઓસ્ટ્રેલિયામાં પણ ગીરની કેસર અને મહારાષ્ટ્રની હાફૂસ કેરીનું ચાલુ સીઝનનું પ્રથમ કન્સાઇનમેન્ટ પહોંચી ગયું છે. તાલાલાના જસાપુરના પ્રગતિશીલ ખેડૂત ચેતન મેંદપરાની કંપની ‘ધ મેંગો માર્ટ’ દ્વારા મુંબઈ એરપોર્ટથી એરકાર્ગો મારફતે 800 બોક્સનો જથ્થો ઓસ્ટ્રેલિયા રવાના કરવામાં આવ્યો છે.

આ પ્રથમ ખેપમાં 600 બોક્સ કેસર અને 200 બોક્સ રત્નાગિરિ હાફૂસનો સમાવેશ થાય છે. આ જથ્થાનું પ્રોસેસિંગ નવી મુંબઈના વાસી ખાતે કરવામાં આવ્યું હતું. નોંધનીય છે કે ઓસ્ટ્રેલિયાની સફળ નિકાસ બાદ હવે નિકાસકારો કેનેડાના બજારને સર કરવા તૈયાર છે. અમદાવાદના બાવળા ખાતે 800 બોક્સ પર રેડિયેશન પ્રક્રિયા પૂર્ણ કરી તેનું પેકિંગ કરવામાં આવી રહ્યું છે.

નિકાસ પર યુદ્ધની કાળી છાયા

વર્ષ 2026ની આ સીઝન નિકાસકારો માટે પડકારજનક સાબિત થઈ રહી છે. ખાડીના દેશોમાં ચાલી રહેલા યુદ્ધને કારણે એરકાર્ગોના ભાડામાં મોટો ઉછાળો આવ્યો છે. 18% GST અને વીમા ખર્ચમાં વધારાને કારણે નિકાસનો ખર્ચ ડબલ થઈ ગયો છે. પરિણામે, ઓમાન, કતાર અને દુબઈ જેવા દેશોમાં આ વર્ષે નિકાસ ઘટવાની ભીતિ છે.

એરકાર્ગો ભાડામાં ફેરફાર (પ્રતિ કિલો):

ખર્ચ વધવા છતાં વિદેશી બજારમાં ભારતીય કેરીનો ક્રેઝ યથાવત છે. ઓસ્ટ્રેલિયામાં હાલમાં 3 કિલોના બોક્સના 65 ઓસ્ટ્રેલિયન ડોલર અને કેનેડામાં 45 થી 50 કેનેડિયન ડોલર ભાવ મળી રહ્યા છે. જોકે, નિકાસકારોનું માનવું છે કે જો ભાડામાં ઘટાડો નહીં થાય તો આ વર્ષે કેસર કેરીની કુલ નિકાસમાં ગત વર્ષની સરખામણીએ ઘટાડો નોંધાઈ શકે છે.