• નકલી કચેરીઓ અને ઘી-તેલ બાદ હવે વ્યસનીઓ પણ ફસાયા - નામાંકિત કંપનીઓના નામે હલકો માલ પધરાવવાનું કૌભાંડ
• પુનાની કંપનીના અધિકારીઓની સતર્કતાથી ભાંડો ફૂટ્યો - રાજકમલ અને સાબળે બીડીના નકલી પેકેટો જપ્ત
• અમરેલીના ઈરફાન પઠાણ પાસેથી આવતો હતો નકલી માલ - સૌરાષ્ટ્રના ગ્રામ્ય વિસ્તારોમાં વધુ નફાની લાલચે વેચાણ

ગુજરાતમાં છેલ્લા કેટલાક સમયથી નકલી ઘી, તેલ અને નકલી સરકારી કચેરીઓના કિસ્સાઓ ચર્ચામાં છે, ત્યારે હવે જૂનાગઢના કેશોદ પાસે નકલી બીડીનું એક મોટું કૌભાંડ સામે આવ્યું છે. પોલીસે રવિવારે કેશોદના વેરાવળ રોડ પર આવેલી તોરલ હોટેલ પાસે વોચ ગોઠવીને એક ઈકો કારને આંતરી હતી, જેમાંથી નામાંકિત કંપનીઓના નામે પેક કરેલી નકલી બીડીનો મસમોટું જથ્થો મળી આવ્યો હતો. પોલીસે અંદાજે ₹3.12 લાખના મુદ્દામાલ સાથે કોડીનારના એક શખ્સની ધરપકડ કરી છે.

આ સમગ્ર કૌભાંડનો પર્દાફાશ મહારાષ્ટ્રની પ્રસિદ્ધ 'સાબળે વાધીરે એન્ડ કંપની' ના જાગૃત ફિલ્ડ ઓફિસર જીતેન્દ્રભાઈ જેઠવાની સતર્કતાથી થયો છે. તેમને બાતમી મળી હતી કે એક સફેદ ઈકો કારમાં કંપનીના નામે નકલી બીડીનો જથ્થો લઈ જવામાં આવી રહ્યો છે. પોલીસે બાતમીના આધારે વોચ ગોઠવી કારની તલાશી લેતા, તેમાંથી રાજકમલ બીડીના 107 પેકેટ અને સાબળે બીડીના 136 પેકેટ મળી આવ્યા હતા. આ પેકેટો પર કંપનીના લોગોવાળા બનાવટી રેપર છાપેલા હતા, પરંતુ અંદર રહેલી બીડી અત્યંત હલકી ગુણવત્તાની હતી.

પોલીસે આ મામલે કોડીનારના એક્તા ચોક વિસ્તારમાં રહેતા કિરણ લક્ષ્મણભાઈ સોલંકીની ધરપકડ કરી છે. પ્રાથમિક પૂછપરછમાં આરોપીએ કબૂલાત કરી છે કે આ નકલી જથ્થો તેને અમરેલીના ઈરફાન પઠાણ નામના શખ્સ દ્વારા પૂરો પાડવામાં આવતો હતો. આરોપીઓની મોડસ ઓપરેન્ડી એવી હતી કે તેઓ સૌરાષ્ટ્રના ગ્રામ્ય વિસ્તારોમાં ભોળા વેપારીઓને વધુ નફાની લાલચ આપીને આ નકલી બીડી પધરાવતા હતા. સામાન્ય માણસ આ અસલી અને નકલી વચ્ચેનો તફાવત સહેલાઈથી ઓળખી શકતો નહોતો.

આરોગ્ય નિષ્ણાતોના મતે, નકલી બીડીમાં વપરાતા નબળા તમાકુ અને અજાણ્યા હાનિકારક પદાર્થો ફેફસાં અને ગળાની ગંભીર બીમારીઓ તેમજ કેન્સરનું જોખમ અનેકગણું વધારી શકે છે. ઠગબાજો માત્ર નફા માટે ગરીબ અને શ્રમજીવી વર્ગના લોકોના સ્વાસ્થ્ય સાથે ચેડાં કરી રહ્યા છે. પોલીસે ગુનો નોંધીને તપાસના ચક્રો ગતિમાન કર્યા છે કે આ નકલી રેપર ક્યાં છાપવામાં આવતા હતા અને આ નેટવર્કમાં અન્ય કેટલા લોકો સંડોવાયેલા છે.

કેશોદ પોલીસની આ સફળ કામગીરીથી નકલી માલ વેચનારા તત્વોમાં ફફડાટ વ્યાપી ગયો છે. ગ્રાહકોને પણ અપીલ કરવામાં આવી છે કે બજાર ભાવ કરતા વધુ સસ્તી મળતી બ્રાન્ડેડ વસ્તુઓની ખરીદી વખતે સાવચેતી રાખવી અને શંકા જણાય તો તુરંત પોલીસને જાણ કરવી. આગામી દિવસોમાં આ મામલે અમરેલી અને અન્ય શહેરોમાં પણ દરોડા પાડવામાં આવે તેવી શક્યતા છે.