સિટી ન્યુઝ @ સ્પોર્ટ્સ ડેસ્ક

બેંગલુરુ ખાતે રમાઈ રહેલા દુલીપ ટ્રોફી સેમીફાઇનલ મુકાબલામાં ભારતીય સ્થાનિક ક્રિકેટના ઇતિહાસમાં એક અનોખો અને યાદગાર પ્રસંગ જોવા મળ્યો છે. ઈસ્ટ ઝોન તરફથી રમી રહેલા 15 વર્ષીય યુવા બેટ્સમેન વૈભવ સૂર્યવંશીએ મેચ દરમિયાન ટીમની કેપ્ટનશીપ સંભાળી હતી. ઈસ્ટ ઝોનના નિયમિત કેપ્ટન ઇશાન કિશન મેચ દરમિયાન ઇજાગ્રસ્ત થવાના કારણે મેદાનની બહાર જવું પડતાં વાઇસ કેપ્ટન વૈભવને સુકાની પદની જવાબદારી સોંપવામાં આવી હતી.

કેપ્ટન તરીકે મેદાનમાં ઉતરતાની સાથે જ વૈભવે પોતાની પરિપક્વતા અને ચતુરાઈનો પરચો આપ્યો હતો. સેન્ટ્રલ ઝોનના ઓપનર આર્યન જુયાલ સામે અપીલ કરતી વખતે વૈભવે કેપ્ટન તરીકે પોતાનો પહેલો DRS રિવ્યૂ લીધો હતો, જે એકદમ સાચો સાબિત થયો અને ટીમને મહત્વની સફળતા મળી હતી.

ઉલ્લેખનીય છે કે, આ સેમીફાઇનલ મેચમાં ઈસ્ટ ઝોને ટોસ જીતીને પ્રથમ ફિલ્ડિંગ પસંદ કરી હતી. માત્ર 15 વર્ષની નાની ઉંમરે દુલીપ ટ્રોફી જેવી પ્રીમિયર ફર્સ્ટ ક્લાસ ટુર્નામેન્ટમાં કેપ્ટનશીપ સંભાળીને વૈભવ સૂર્યવંશીએ ક્રિકેટ જગતમાં ભારે ધ્યાન આકર્ષિત કર્યું છે.

15 વર્ષનો વૈભવ બન્યો ઈસ્ટ ઝોનનો કેપ્ટન

દુલીપ ટ્રોફી સેમીફાઇનલમાં ઇશાન કિશન ઇજાગ્રસ્ત થતાં 15 વર્ષીય વાઇસ કેપ્ટન વૈભવ સૂર્યવંશીએ ઈસ્ટ ઝોનની કેપ્ટનશીપ સંભાળી હતી. કેપ્ટન તરીકે તેણે સેન્ટ્રલ ઝોનના ઓપનર સામે લીધેલો પહેલો જ રિવ્યૂ સફળ રહ્યો હતો અને ટીમને મહત્વપૂર્ણ વિકેટ અપાવી હતી.

► 266 રન પર ઓલ આઉટ થઈ ગઈ સેન્ટ્રલ ઝોનની પહેલી ઇનિંગ
► 60 રન સૌથી વધુ સેન્ટ્રલ ઝોન માટે રિંકુ સિંહે બનાવ્યાં
► 3-3 વિકેટ ઇસ્ટ ઝોન માટે મુકેશ અને અભિજીતે ઝડપી