સિટી ન્યુઝ @ વાશિંગ્ટન 

શરીરનું દરેક અંગ અમૂલ્ય છે અને ત્વચા માનવીની સુંદરતા દર્શાવે છે, પરંતુ હાલમાં જ દુનિયાભરમાં પ્રખ્યાત બ્યુટી ટ્રેન્ડ પાછળનું એક એવું કડવું સત્ય સામે આવ્યું છે જેણે નૈતિકતા પર ગંભીર સવાલો ખડા કર્યા છે.

દક્ષિણ કોરિયાની બાયોટેક કંપનીઓ અમેરિકી નાગરિકોના મૃત્યુ પછી દાનમાં મળેલી ત્વચા (ટિશ્યુ) ને પ્રોસેસ કરીને પ્રવાહી ઇન્જેક્શનમાં ફેરવી રહી છે, જેનાથી ચહેરાની કરચલીઓ મિટાવીને યુવાન દેખાવાનો દાવો કરાય છે.

અમેરિકામાં મૃત્યુ પામેલા લોકોની પેશીઓ હજારો માઈલ દૂર દક્ષિણ કોરિયાની હાઈ-ટેક લેબમાં પહોંચે છે અને ત્યાંથી તેને 'બ્યુટી એન્ડ સ્કિન બૂસ્ટર' તરીકે બજારમાં વેચવામાં આવે છે.

આ ચોંકાવનારી પ્રક્રિયા સામે આવ્યા બાદ વૈશ્વિક સ્તરે માનવ અંગો અને પેશીઓના વેપાર તેમજ તેની નૈતિક સીમાઓ અંગે ભારે ચર્ચા અને વિવાદ શરૂ થઈ ગયો છે.

લોકોમાં યુવાન દેખાવાની ઘેલછા અને બ્યુટી ઇન્ડસ્ટ્રિઝની આ અતિ-આધુનિક રેસ હવે માનવ સંવેદનાઓ અને મર્યાદાઓને પણ વટાવી રહી છે તેવું આ ઘટના સ્પષ્ટપણે દર્શાવે છે.

મૃતકોની ત્વચા અને કોરિયન બ્યુટી ઇન્જેક્શનનું કડવું સત્ય

અમેરિકામાં મૃત્યુ પામેલા નાગરિકોની દાનમાં મળેલી ત્વચાને દક્ષિણ કોરિયાની લેબમાં પ્રોસેસ કરીને બ્યુટી ઇન્જેક્શન બનાવવાનો આ મામલો આધુનિક સુંદરતાના પાખંડ અને નૈતિક અધપતનનો ઉત્તમ નમૂનો છે. ત્વચા દાનના પવિત્ર ઉદ્દેશ્યને વેપારીકરણની ભઠ્ઠીમાં હોમીને તેને કરચલીઓ મિટાવવાના સ્કિન બૂસ્ટર તરીકે વાપરવું એ માનવતાને શરમમાં મૂકે તેવી ઘટના છે. આ ગ્લોબલ બ્યુટી ટ્રેન્ડે સાબિત કરી દીધું છે કે ગ્લેમર અને સુંદરતાની પાછળ દુનિયા કયા હદ સુધી નીચે જઈ શકે છે, જેણે નૈતિકતા અને કાયદાકીય નિયમનો સામે ગંભીર પ્રશ્નાર્થો ખડા કર્યા છે.