• એકવીસ લાખ ફોલોઅર્સ હોવા છતાં મળ્યા તેત્રીસ મત!
• રાજસ્થાનની પંચાયત ચૂંટણીમાં જ્યોતિષી ઓમપ્રકાશને મળ્યો મોટો ઝટકો!
• ઓનલાઇન લોકપ્રિયતા જમીની સ્તરે મતમાં પરિવર્તિત ન થઈ!

સિટી ન્યુઝ @ જોધપુર 

સોશિયલ મીડિયા પર લાખો ફોલોઅર્સ ધરાવતા લોકપ્રિય ઇન્ફ્લુએન્સર અને જ્યોતિષી ઓમ પ્રકાશ બિશ્નોઈને રાજસ્થાનની પંચાયત ચૂંટણીમાં અત્યંત કારમી હારનો સામનો કરવો પડ્યો છે. જોધપુર જિલ્લાના ઓસિયાં તાલુકાની ઇંદો કી ઢાણી ગ્રામ પંચાયતમાં સરપંચ પદ માટે ચૂંટણી લડનાર બિશ્નોઈને કુલ 1,600 મતમાંથી માત્ર 33 મત જ પ્રાપ્ત થયા હતા. ઇન્સ્ટાગ્રામ, ફેસબુક અને યુટ્યુબ મળીને વિવિધ પ્લેટફોર્મ પર 21 લાખથી વધુ ફોલોઅર્સ ધરાવતા હોવા છતાં તેમની આ ઓનલાઇન લોકપ્રિયતા વાસ્તવિક જનસમર્થનમાં બદલાઈ શકી ન હતી. ચૂંટણી પ્રચાર દરમિયાન તેમણે નશામુક્તિનો મુખ્ય મુદ્દો બનાવ્યો હતો, પરંતુ પરિણામ બાદ તેમણે ખુદ સ્વીકાર્યું હતું કે તેમને મળેલા 33 મતમાંથી 11 મત પરિવારના અને બાકીના મિત્રોના હતા. આ ચૂંટણી પરિણામોએ ફરી એકવાર સાબિત કરી દીધું છે કે સોશિયલ મીડિયા પરની ડિજિટલ લોકપ્રિયતા અને જમીની સ્તરનું વાસ્તવિક રાજકીય સમર્થન બંને બિલકુલ અલગ બાબતો છે.