સિટી ન્યૂઝ @ ભાવનગર: ભાવનગરના સુભાષનગર રોડ પર રબ્બર સોસાયટી પાસે સામાન્ય વાહન અથડામણ જેવી બાબતે હિંસક વળાંક લેતા શહેરના રાજકીય વર્તુળોમાં ફફડાટ ફેલાયો છે. શહેરના વોર્ડ નં. 13 ના કોંગ્રેસ પ્રમુખ અને તેમના માતા, જેઓ પૂર્વ મહિલા ઉમેદવાર રહી ચૂક્યા છે, તેમના પર કારચાલક અને તેના સાથીઓએ લોખંડના પાઈપ વડે હુમલો કર્યો છે. આ હુમલામાં મહિલાને ગંભીર ઈજાઓ પહોંચતા હાલ તેઓ સારવાર હેઠળ છે. પોલીસે આ મામલે કારચાલક સહિત 5 લોકો વિરુદ્ધ વિવિધ કલમો હેઠળ ગુનો નોંધી તપાસના ચક્રો ગતિમાન કર્યા છે.

બનાવની વિગતો એવી છે કે, શ્રમજીવી સોસાયટીમાં રહેતા નિલેષ ધાપા અને તેમના માતા ગીતાબેન ધાપા ગત તા. 2 ના રોજ એક્ટિવા પર જઈ રહ્યા હતા. સુભાષનગર ચોક પાસે રબ્બર સોસાયટી નજીકથી પસાર થતી વેળાએ એક પૂરપાટ ઝડપે આવતી કાર (નંબર GJ-15-CH-2520) ગીતાબેનના પગે અડી ગઈ હતી. નિલેષભાઈએ ચાલકને ઠપકો આપતા કારચાલકે ઉશ્કેરાઈને અપશબ્દો બોલવાનું શરૂ કર્યું હતું. જોતજોતામાં વિવાદ ઉગ્ર બન્યો હતો અને કારમાં સવાર શખ્સોએ હુમલો કરી દીધો હતો.

કારચાલકે કારમાંથી લોખંડનો પાઈપ કાઢી નિલેષભાઈ પર પ્રહાર કરવાનો પ્રયાસ કર્યો હતો. પુત્રને બચાવવા વચ્ચે પડેલા માતા ગીતાબેન પર હુમલાખોરોએ પાઈપથી આડેધડ ઘા ઝીંક્યા હતા, જેના કારણે તેમને હાથ અને શરીરના ભાગે ગંભીર ઈજાઓ થઈ હતી. કારમાં સવાર એક અજાણી મહિલાએ પણ ગીતાબેનને થપ્પડ અને ચંપલ વડે માર માર્યો હતો. હુમલાખોરોની આ ગુંડાગીરીથી આસપાસના લોકોમાં પણ ભયનો માહોલ જોવા મળ્યો હતો.

અત્યંત ગંભીર બાબત એ છે કે, કારચાલકે ફોન કરીને વધુ બે શખ્સોને સ્થળ પર બોલાવ્યા હતા અને "આજે તો આને જીવતો નથી મૂકવો" તેવી ધમકી આપી હતી. આસપાસ ભીડ એકઠી થતા હુમલાખોરો "જો પોલીસ ફરિયાદ કરશો તો જાનથી મારી નાખીશું" તેવી ધમકી આપી કાર લઈને ફરાર થઈ ગયા હતા. ઈજાગ્રસ્ત માતા-પુત્રને તાત્કાલિક હોસ્પિટલ ખસેડવામાં આવ્યા હતા. ગીતાબેન ધાપા તાજેતરમાં જ કોંગ્રેસ પક્ષમાંથી ચૂંટણી લડ્યા હોવાથી આ હુમલાએ રાજકીય રંગ પણ પકડ્યો છે.

ઘોઘારોડ પોલીસે આ મામલે કડક વલણ અપનાવ્યું છે. પોલીસે નિલેષભાઈની ફરિયાદના આધારે કાર ચાલક, એક મહિલા અને અન્ય 3 અજાણ્યા શખ્સો વિરુદ્ધ ભારતીય ન્યાય સંહિતાની કલમ 115(2), 117(2), 352, 351(3) અને જીપી એક્ટ 135 હેઠળ ગુનો દાખલ કર્યો છે. પોલીસ ઇન્સ્પેક્ટર દ્વારા હુમલાખોરોને પકડવા માટે વિવિધ ટીમો બનાવીને સીસીટીવી ફૂટેજના આધારે તપાસ શરૂ કરવામાં આવી છે. ભાવનગરમાં વધતી જતી આ પ્રકારની રોડ રેજની ઘટનાઓ ચિંતાનો વિષય બની છે.