સિટી ન્યુઝ @ નવી દિલ્હી

ભારતની અધ્યક્ષતામાં નવી દિલ્હી ખાતે 12-13 September દરમિયાન 18મી BRICS સમિટ યોજાવા જઈ રહી છે. આ વૈશ્વિક સંમેલનમાં રશિયાના રાષ્ટ્રપતિ વ્લાદિમીર પુતિનની ઉપસ્થિતિ નિશ્ચિત થઈ ચૂકી છે, જ્યારે ચીનના રાષ્ટ્રપતિ શી જિનપિંગ પણ ભારત પ્રવાસે આવે તેવી પ્રબળ શક્યતાઓ જોવા મળી રહી છે. જો શી જિનપિંગ ભારત આવશે, તો ઓક્ટોબર 2019માં તમિલનાડુના મહાબલીપુરમ ખાતે યોજાયેલી અનૌપચારિક બેઠક બાદ લગભગ 7 વર્ષ પછી આ તેમની પ્રથમ ભારત યાત્રા હશે.

વિદેશ મંત્રાલયના સૂત્રોના જણાવ્યા અનુસાર, ચીન તરફથી સત્તાવાર જાહેરાતની રાહ જોવાઈ રહી છે, પરંતુ બંને દેશોની એડવાન્સ સુરક્ષા અને પ્રોટોકોલ ટીમો વચ્ચેની તૈયારીઓ તેમની મુલાકાતના સ્પષ્ટ સંકેત આપે છે. જિનપિંગના સંભવિત પ્રવાસ પહેલાં ભારતના NSA અજીત ડોભાલ સરહદી મુદ્દાઓ પર 25મા રાઉન્ડની વિશેષ પ્રતિનિધિ વાટાઘાટો માટે બેઈજિંગ જઈ શકે છે, જ્યાં તેઓ ચીનના વિદેશ મંત્રી વાંગ યી સાથે મુલાકાત કરીને LAC પર કાયમી શાંતિ અને સરહદ વ્યવસ્થાપન પર ચર્ચા કરશે.

આ સંભવિત મુલાકાત દરમિયાન માત્ર સરહદી વિવાદ જ નહીં, પરંતુ દ્વિપક્ષીય વેપાર સંબંધો પણ મુખ્ય એજન્ડામાં રહેશે. ભારત ચીન સાથેની પોતાની વિશાળ વેપાર ખાધ ઘટાડવા તેમજ રેર અર્થ મેગ્નેટ અને મહત્વપૂર્ણ ઇલેક્ટ્રોનિક ઘટકો માટે ચીન પરની નિર્ભરતા ઘટાડવા પ્રયાસરત છે. બંને દેશો વચ્ચે સરહદી વેપાર અને વિઝા પ્રક્રિયા સામાન્ય બનાવવા પર વાતચીત ચાલી રહી છે, જે અંતર્ગત 1 August થી ઉત્તરાખંડ અને સિક્કિમ સરહદે વેપાર તેમજ કૈલાશ માનસરોવર યાત્રા પુનઃ શરૂ થઈ ચૂકી છે.

આ વર્ષે BRICS સંગઠનની કમાન ભારત સંભાળી રહ્યું છે. આ જૂથમાં ભારત, રશિયા, ચીન, બ્રાઝિલ અને દક્ષિણ આફ્રિકા ઉપરાંત ઇજિપ્ત, ઇરાન, ઇથોપિયા, UAE અને ઇન્ડોનેશિયા જેવા દેશો સભ્ય તરીકે જોડાયેલા છે. ભારતની અધ્યક્ષતા હેઠળ દેશના વિવિધ શહેરોમાં આયોજિત મંત્રીસ્તરીય બેઠકો મારફતે ગ્લોબલ સાઉથનો અવાજ મજબૂત કરવા, સપ્લાય ચેઇન મજબૂતીકરણ, આર્થિક સહયોગ અને સુરક્ષા પર ખાસ ધ્યાન કેન્દ્રિત કરવામાં આવી રહ્યું છે.

વડાપ્રધાન નરેન્દ્ર મોદી અને શી જિનપિંગ વચ્ચે 2024માં રશિયાના કઝાનમાં યોજાયેલી મુલાકાત બાદ નવી દિલ્હીમાં બંને નેતાઓનું આમને-સામને મળવું આંતરરાષ્ટ્રીય સ્તરે ખૂબ મહત્વપૂર્ણ ગણાશે. BRICS સમિટ દરમિયાન પુતિન અને જિનપિંગની સંયુક્ત હાજરી વૈશ્વિક રાજદ્વારી સમીકરણોમાં ભારતની વ્યૂહાત્મક ભૂમિકાને વધુ મજબૂત બનાવશે.

જિનપિંગ BRICS સમિટમાં ભારત આવી શકે

નવી દિલ્હીમાં 12-13 September ના રોજ યોજાનાર 18મા BRICS સંમેલનમાં ચીનના રાષ્ટ્રપતિ શી જિનપિંગ ભારત આવે તેવી શક્યતા છે. ઓક્ટોબર 2019 પછી આ તેમની પ્રથમ ભારત યાત્રા હશે. સમિટ દરમિયાન વડાપ્રધાન મોદી અને જિનપિંગ વચ્ચે LAC સરહદ વિવાદ, વેપાર ખાધ અને સપ્લાય ચેઈન મુદ્દે દ્વિપક્ષીય વાતચીત થઈ શકે છે. રશિયાના રાષ્ટ્રપતિ પુતિન પણ આ સમિટમાં જોડાશે.