સિટી ન્યુઝ @ અમદાવાદ / ગાંધીનગર

અમદાવાદ શહેરની પ્રતિષ્ઠિત ત્રણ શાળાઓ તેમજ પાટનગર ગાંધીનગરની જિલ્લા અને સેશન્સ કોર્ટને ઈ-મેલ દ્વારા બોમ્બથી ઉડાવી દેવાની ગંભીર ધમકી મળતાં સમગ્ર રાજ્યમાં ભારે ચકચાર અને ખળભળાટ મચી ગયો છે. બોપલ સ્થિત ડીપીએસ (DPS), થલતેજની ઉદગમ સ્કૂલ અને વેજલપુરની ઝાયડસ સ્કૂલ સહિતની સંસ્થાઓને સવારે સત્તાવાર મેઇલ પર આ ધમકી મળી હતી. ઘટનાની ગંભીરતાને ધ્યાનમાં રાખીને પોલીસ કાફલો, બોમ્બ ડિસ્પોઝલ સ્ક્વોડ (BDDS), ડોગ સ્ક્વોડ અને ફાયર બ્રિગેડની ટીમો તાબડતોબ ઘટનાસ્થળે દોડી ગઈ હતી.

સુરક્ષાના આગોતરા પગલાં તરીકે તમામ સંબંધિત શાળાઓને સત્વરે ખાલી કરાવવામાં આવી હતી અને વિદ્યાર્થીઓને તાત્કાલિક રજા આપી દેવાઈ હતી. અચાનક શાળાઓ બંધ થવાના સમાચાર મળતાં જ ગભરાયેલા વાલીઓ પોતાના બાળકોને લેવા માટે સ્કૂલે દોડી આવ્યા હતા, જેના કારણે પરિસરમાં અફરાતફરીનો માહોલ સર્જાયો હતો. કોઈપણ કટોકટીની સ્થિતિને પહોંચી વળવા પ્રહલાદનગર ફાયર સ્ટેશનની ગાડીઓ અને 108 એમ્બ્યુલન્સ પણ સ્થળ પર તૈનાત કરી દેવામાં આવી હતી અને શાળાઓના એક-એક ખૂણાની સઘન તપાસ હાથ ધરવામાં આવી હતી.

બીજી તરફ ગાંધીનગર જિલ્લા અને સેશન્સ કોર્ટના સત્તાવાર ઈ-મેલ પર પણ વિસ્ફોટ કરવાની ધમકી મળતાં જ કોર્ટ પરિસરને તાત્કાલિક ખાલી કરાવીને સુરક્ષા દળો દ્વારા સર્ચ ઓપરેશન શરૂ કરવામાં આવ્યું હતું. ઉલ્લેખનીય છે કે, અગાઉ ગુજરાત હાઈકોર્ટ તેમજ સુરત કોર્ટને પણ આ પ્રકારે ધમકી આપવામાં આવી હતી, જેમાં સાયબર ક્રાઈમે બે શંકાસ્પદ શખ્સોને ઝડપી લીધા હતા. આ ગંભીર પરિસ્થિતિને જોતાં અમદાવાદ જિલ્લા શિક્ષણાધિકારી (DEO) એ તમામ શાળાઓને એલર્ટ રહેવા, ઈ-મેલ એકાઉન્ટ્સ સતત ચકાસવા અને કોઈપણ શંકાસ્પદ બાબત જણાયે તાત્કાલિક પોલીસને જાણ કરી તપાસમાં સહયોગ આપવા કડક આદેશ જારી કર્યા છે.

અમદાવાદની સ્કૂલો અને ગાંધીનગર કોર્ટને બોમ્બની ધમકી

અમદાવાદની DPS, ઉદગમ અને ઝાયડસ સ્કૂલ તેમજ ગાંધીનગર સેશન્સ કોર્ટને ઈ-મેલ દ્વારા બોમ્બથી ઉડાવી દેવાની ધમકી મળતાં તંત્ર દોડતું થયું છે. પરિસરો ખાલી કરાવી વિદ્યાર્થીઓને સુરક્ષિત ઘેર મોકલાયા હતા અને બોમ્બ સ્ક્વોડ દ્વારા સઘન સર્ચ ઓપરેશન હાથ ધરાયું છે. DEO દ્વારા તમામ સ્કૂલોને સતર્ક રહેવા આદેશ કરાયા છે.