• નિમુબેન બાંભણીયા અને મનસુખ માંડવીયાના પ્રયાસો સફળ - પ્રથમ ફ્લાઈટમાં 30 દિવ્યાંગો અને શિક્ષકો મુંબઈ જશે
• ટ્રાવેલ એજન્ટ્સમાં ખુશીનો માહોલ - હવે ચેન્નાઈ, બેંગ્લોર અને ગોવા માટે મળશે 'સેમ-ડે કનેક્ટિવિટી'
• હેરિટેજ અને કોસ્ટલ ટુરિઝમને મળશે નવું બળ - ઉદ્યોગપતિઓ અને રાજકીય અગ્રણીઓની ઉપસ્થિતિમાં થશે પ્રારંભ.

ભાવનગરના રત્નકલાકારો, વેપારીઓ અને પ્રવાસીઓ માટે લાંબા સમયનો ઇન્તજાર હવે ખતમ થયો છે. છેલ્લા 8 મહિનાથી બંધ પડેલી ભાવનગર-મુંબઈ હવાઈ સેવા આવતીકાલ એટલે કે રવિવાર, 29 માર્ચથી ફરી શરૂ થઈ રહી છે. ઈન્ડિગો એરલાઇન્સ દ્વારા શરૂ કરવામાં આવેલી આ સેવા ભાવનગરને સીધું નવી મુંબઈ એરપોર્ટ સાથે જોડશે. કેન્દ્રીય નાગરિક ઉડ્ડયન મંત્રી કે.આર. નાયડુ ખાસ ભાવનગર આવીને પ્રથમ ફ્લાઈટને લીલી ઝંડી બતાવશે.

રાજકીય નેતૃત્વ અને સંયુક્ત પ્રયાસો આ હવાઈ સેવાને ફરી જીવંત કરવા માટે ભાવનગરના સાંસદ અને કેન્દ્રીય રાજ્ય મંત્રી નિમુબેન બાંભણીયાએ સતત રજૂઆતો કરી હતી. આ પ્રયાસોમાં કેન્દ્રીય કેબિનેટ મંત્રી ડૉ. મનસુખભાઈ માંડવીયાનો પણ મહત્વનો સહયોગ સાંપડ્યો છે. આવતીકાલે સવારે 8:35 કલાકે જ્યારે પ્રથમ ફ્લાઈટ ઉડાન ભરશે ત્યારે રાજ્યના કેબિનેટ મંત્રી જીતુભાઈ વાઘાણી, પરષોત્તમ સોલંકી અને સ્થાનિક ધારાસભ્યો સહિતના અગ્રણીઓ હાજર રહેશે. એક વિશેષ પહેલના ભાગરૂપે પ્રથમ ફ્લાઈટમાં 30 દિવ્યાંગજનો અને શિક્ષકોને મુંબઈ પ્રવાસે મોકલવાની વ્યવસ્થા પણ કરવામાં આવી છે.

સમય અને ભાડાની વિગતો એરપોર્ટ ડાયરેક્ટર તપનકુમાર નાયકના જણાવ્યા મુજબ, ઈન્ડિગોની આ ફ્લાઈટ દિવસમાં બે વાર સવાર-સાંજ ઉપલબ્ધ રહેશે. સવારે 8:30 આસપાસ અને સાંજે 8:50 કલાકે ભાવનગરથી નવી મુંબઈ માટે ફ્લાઈટ ઉપડશે. આ મુસાફરી માત્ર 1 કલાકમાં પૂર્ણ થશે. ભાડાની વાત કરીએ તો, પ્રારંભિક સ્તરે ₹3,400 થી ₹7,000 સુધીના દરો રાખવામાં આવ્યા છે, જે મુસાફરોની બુકિંગ કેટેગરી પર નિર્ભર રહેશે.

કનેક્ટિવિટીનો નવો વ્યાપ ટ્રાવેલ એજન્ટ્સ એસોસિએશન ઓફ ભાવનગર (TAAB) ના મતે, આ ફ્લાઈટ માત્ર મુંબઈ જવા માટે જ નહીં પણ દક્ષિણ ભારત અને નોર્થ-ઈસ્ટના રાજ્યોમાં જવા માટે પણ વરદાન સાબિત થશે. નવી મુંબઈ એરપોર્ટથી મુસાફરોને તે જ દિવસે ચેન્નાઈ, બેંગ્લોર, મદુરાઈ અને ગોવા જેવી ફ્લાઈટ મળી રહેશે. આનાથી ભાવનગરના હેરિટેજ અને એજ્યુકેશનલ ટુરિઝમને મોટો વેગ મળશે અને હીરા ઉદ્યોગના વેપારીઓ માટે મુંબઈ જવું અત્યંત સરળ બની જશે.