• ક.પરા વિસ્તારમાં આતંકનો માહોલ - રોડ પર ઢસડીને માર માર્યા બાદ જાનથી મારી નાખવાની ધમકી
• તલવારના ઘા ઝીંકી દંપતીએ યુવાનને રસ્તા પર ઢસડ્યો - ગંગાજળિયા પોલીસે ગુનો નોંધી તપાસ શરૂ કરી
• દિવાલની લાદી તૂટતા આપ્યો હતો ઠપકો, બદલામાં મળી તલવાર - ઇજાગ્રસ્ત યુવાન સિવિલ હોસ્પિટલમાં સારવાર હેઠળ

શહેરમાં પાડોશીઓ વચ્ચેના સંબંધોમાં કડવાશ અને હિંસાની વધુ એક ચોંકાવનારી ઘટના સામે આવી છે. ક.પરા રાંદલમાના ચોક પાસે દિવાલમાં ખીલા ઠોકવાની સામાન્ય બાબત લોહિયાળ સંઘર્ષમાં પરિણમી હતી. આ હિંસક હુમલામાં એક યુવાન ગંભીર રીતે ઇજાગ્રસ્ત થયો છે અને તેને હોસ્પિટલમાં ખસેડવો પડ્યો છે.

ઠપકો આપવો ભારે પડ્યો ફરિયાદ મુજબ, સાગર મકવાણાના પાડોશી ઈશ્વર જાદવ પોતાની દિવાલમાં ખીલા ઠોકતા હતા, જેના કારણે સાગરના ઘરની દિવાલની લાદીને નુકસાન થતું હતું. આ બાબતે સાગરના માતા ભાવનાબેને ઈશ્વરને ઠપકો આપ્યો હતો. આ સામાન્ય ઠપકો ઈશ્વર અને તેની પત્ની જાગુબેનને એટલો ખરાબ લાગ્યો કે તેઓ ગાળાગાળી કરવા લાગ્યા અને ઝઘડો ઉગ્ર બની ગયો.

રસ્તા પર ઢસડીને માર્યો ઝઘડો વધતા ઈશ્વર જાદવ પોતાના ઘરેથી તલવાર લઈ આવ્યો હતો અને સાગર પર હુમલો કર્યો હતો. તલવારનો ઘા વાગતા સાગર લોહીલુહાણ થઈ ગયો હતો. એટલું જ નહીં, ઉશ્કેરાયેલા દંપતીએ સાગરને રસ્તા પર ઢસડીને માર માર્યો હતો અને જાનથી મારી નાખવાની ધમકી પણ આપી હતી. સદનસીબે કુટુંબીજનોએ વચ્ચે પડીને સાગરને વધુ ઇજા થતા બચાવી લીધો હતો.

પોલીસ કાર્યવાહી ઇજાગ્રસ્ત સાગરને તાત્કાલિક ભાવનગર સરકારી હોસ્પિટલ ખસેડવામાં આવ્યો હતો. ગંગાજળિયા પોલીસે આ મામલે ગંભીરતા દાખવી ઈશ્વર અને જાગુબેન જાદવ સામે ગુનો નોંધ્યો છે. પોલીસે વિવિધ કલમો હેઠળ ગુનો દાખલ કરી દંપતીની અટકાયત કરવાની કાર્યવાહી તેજ કરી છે. નજીવા કારણોસર થતા આવા હિંસક હુમલાઓએ વિસ્તારમાં ચર્ચા જગાવી છે.