સિટી ન્યુઝ @ ભાવનગર

ભાવનગરના જવાહર મેદાન ખાતે આયોજિત જન્માષ્ટમી લોકમેળામાં ખાખી વર્દી અને પોલીસના નામે ખોટો રોફ જમાવતા એક નકલી પોલીસકર્મીને ઘોઘારોડ પોલીસે રંગેહાથ ઝડપી પાડ્યો છે. પકડાયેલા શખ્સ પાસેથી ગાંધીનગર સ્પેશિયલ ઇન્વેસ્ટિગેશન ટીમ (S.I.T.) ના પોલીસ સબ ઇન્સ્પેક્ટર (PSI) તરીકેનું બનાવટી આઈડેન્ટિટી કાર્ડ મળી આવતાં ચકચાર મચી જવા પામી છે. પોલીસે નકલી આઈડી કાર્ડ જપ્ત કરીને ભુંભલી ગામના શખ્સ વિરુદ્ધ ગુનો નોંધી કાયદેસરની કાર્યવાહી હાથ ધરી છે.

ઘટનાની વિગત મુજબ, જવાહર મેદાન લોકમેળામાં કાયદો અને વ્યવસ્થા જાળવવા ઘોઘારોડ પોલીસ સ્ટેશનનો કાફલો સતત પેટ્રોલિંગમાં હતો. તે દરમિયાન પોલીસને ચોક્કસ બાતમી મળી હતી કે એક શખ્સ પોતાની પાસે પોલીસનું નકલી ઓળખપત્ર રાખીને મેળામાં ફરી રહ્યો છે અને પોલીસનો રોફ બતાવી જુદી-જુદી મનોરંજક રાઇડ્સમાં મફતમાં બેસી મજા માણી રહ્યો છે. મળેલી બાતમીના આધારે પોલીસે તુરંત વોચ ગોઠવીને જવાહર મેદાનમાંથી જગદીશ ડાહ્યાભાઈ મકવાણા નામના શખ્સને કોર્ડન કરી ઝડપી લીધો હતો.

પોલીસે અટકાયત કરી તલાશી લેતાં ઝડપાયેલા શખ્સ પાસેથી 'મોબીન ઇકબાલભાઈ સોડાગર' નામના અને ગાંધીનગર S.I.T. ના PSI દર્શાવતું 'ગુજરાત પોલીસ' નું બનાવટી આઈ-કાર્ડ મળી આવ્યું હતું. વ્યવસાયે રત્નકલાકાર એવા જગદીશ મકવાણાએ જાહેર સેવકનો બનાવટી હોદ્દો ધારણ કરી લોકો પર રોફ જમાવવા આ નકલી કાર્ડનો ઉપયોગ કર્યો હોવાની પોલ ખુલી ગઈ હતી.

ઘોઘારોડ પોલીસે આ નકલી આઈડી કાર્ડ કબજે કરીને ભુંભલી (રામપર) ના રહેવાસી જગદીશ મકવાણા સામે ભારતીય ન્યાય સંહિતા (BNS) ની કલમ 204 સહિતની જોગવાઈઓ હેઠળ ગુનો નોંધ્યો છે. આ શખ્સે આ બોગસ પોલીસ કાર્ડ ક્યાંથી અને કોની મદદથી તૈયાર કરાવ્યું હતું તેમજ ભૂતકાળમાં તેનો કોઈ તોડબાજી કે અન્ય ગુનાહિત પ્રવૃત્તિમાં દુરુપયોગ કર્યો છે કે કેમ તે અંગે પોલીસે ઊંડાણપૂર્વક તપાસ શરૂ કરી છે.

ભાવનગર મેળામાં નકલી PSI ઝડપાયો

ભાવનગરના જવાહર મેદાન લોકમેળામાં ગાંધીનગર S.I.T. ના PSI નું નકલી આઈ-કાર્ડ બતાવી રાઇડ્સમાં મફત મજા માણતા ભુંભલી ગામના જગદીશ મકવાણાને ઘોઘારોડ પોલીસે ઝડપી લીધો છે. મોબીન સોડાગર નામના બોગસ પોલીસ આઈડી કાર્ડ સાથે પકડાયેલા આ રત્નકલાકાર સામે BNS એક્ટ હેઠળ ગુનો નોંધી પોલીસે કાર્ડ બનાવવાના સ્રોત અંગે તપાસ હાથ ધરી છે.