સિટી ન્યુઝ @ અયોધ્યા

અયોધ્યાના રામ મંદિર પરિસરમાં થયેલી કથિત ચોરી અને નાણાકીય અનિયમિતતા મામલે સ્પેશિયલ ઇન્વેસ્ટિગેશન ટીમ (SIT) ની તપાસ જેમ-જેમ આગળ વધી રહી છે, તેમ-જેમ ડિજિટલ પુરાવા મેળવવામાં મોટી મુશ્કેલીઓ નડી રહી છે. 6 દિવસથી ચાલી રહેલી તપાસમાં ખુલાસો થયો છે કે મંદિર પરિસરમાં સીસીટીવી કેમેરાનું સ્ટોરેજ બેકઅપ માત્ર 45 દિવસ સુધી જ ઉપલબ્ધ છે. આના કારણે ચોરી ક્યારથી શરૂ થઈ અને કેટલા સમય સુધી ચાલી, તેનો ચોક્કસ સમયગાળો નક્કી કરવો તપાસ એજન્સી માટે અત્યંત કઠિન બની ગયો છે.

SIT ની પ્રાથમિક તપાસ દરમિયાન જાણવા મળ્યું છે કે મંદિરના ડિજિટલ સર્વરમાં 45 દિવસથી જૂની ફૂટેજ આપમેળે જ ડિલીટ થઈ જતી હતી. આ મર્યાદિત બેકઅપ સિસ્ટમની વચ્ચે પણ સૌથી ચિંતાજનક બાબત એ સામે આવી છે કે ઉપલબ્ધ સીસીટીવી ફૂટેજ સાથે કથિત રીતે છેડછાડ કરવામાં આવી હોવાના સંકેતો મળ્યા છે. આ છેડછાડ પકડવા માટે હવે ડેટાની ફોરેન્સિક તપાસ કરાવવામાં આવશે. જો છેલ્લા 45 દિવસની અંદર કોઈ પણ પ્રકારનું ડિલીટ કે એડિટિંગ કરવામાં આવ્યું હશે, તો તેના ડિજિટલ પુરાવા ફોરેન્સિક રિપોર્ટમાં સામે આવી જશે. મર્યાદિત ડિજિટલ પુરાવા હોવાથી હાલમાં શંકાસ્પદો અને ટ્રસ્ટના હોદ્દેદારોની પૂછપરછ પર જ નિર્ભર રહેવું પડે છે, જેમાં ભારે વિરોધાભાસ જોવા મળ્યો છે.

બીજી તરફ, આ મામલે અયોધ્યા પહોંચેલા ઉત્તર પ્રદેશના મુખ્યમંત્રી યોગી આદિત્યનાથે વિપક્ષો દ્વારા કરવામાં આવી રહેલા રાજકીય પ્રહારો પર આકરો પલટવાર કર્યો હતો. તેમણે કહ્યું હતું કે રામ મંદિર ટ્રસ્ટની સત્તાવાર વિનંતી બાદ જ સરકારે આ મામલે દૂધનું દૂધ અને પાણીનું પાણી કરવા માટે SIT ની રચના કરી છે. રામભક્તો પર ભૂતકાળમાં ગોળીઓ ચલાવનારા અને માફિયાઓના પક્ષધર લોકો આજે અયોધ્યાના નામે દુષ્પ્રચાર કરીને ધામને બદનામ કરવાનો પ્રયાસ કરી રહ્યા છે. મુખ્યમંત્રીએ લોકોને અપીલ કરી છે કે જ્યાં સુધી SIT નો સત્તાવાર અહેવાલ ન આવે ત્યાં સુધી બિનજરૂરી નિવેદનબાજી બંધ રાખે. માત્ર 15 દિવસમાં તપાસ પૂરી થશે અને કોઈ પણ ગુનેગાર બચી શકશે નહીં.

ડિજિટલ સુરક્ષા સિસ્ટમમાં આધુનિકીકરણની જરૂરિયાત

રામ મંદિર જેવા અતિ સંવેદનશીલ અને દેશના સર્વોચ્ચ ધાર્મિક સ્થળ પર સીસીટીવી ફૂટેજનું બેકઅપ માત્ર 45 દિવસનું હોય તે સુરક્ષાની દ્રષ્ટિએ મોટી ખામી ગણી શકાય. કોઈપણ મોટી સંસ્થા કે વીઆઈપી પરિસરમાં ઓછામાં ઓછું 1 વર્ષ કે તેથી વધુ સમયનું ડેટા સ્ટોરેજ હોવું અનિવાર્ય છે. આ ઘટના બાદ ભવિષ્યમાં આવી ટેકનિકલ ખામીઓ ન સર્જાય તે માટે મંદિર પ્રશાસને ક્લાઉડ સ્ટોરેજ અને અદ્યતન ડિજિટલ સુરક્ષા સિસ્ટમ ગોઠવવી પડશે જેથી ડેટા સાથે છેડછાડની શક્યતા ન રહે.