• દીકરાને બચાવવા ગયેલા પિતા પર બે શખસો તૂટી પડ્યા - વરતેજ પોલીસે ગુનો નોંધી તપાસ તેજ કરી
• હીરાના કારખાનાના હિસાબની માથાકૂટમાં વૃદ્ધ ખેડૂત ઘાયલ - ભાવેશ અને નરેશ ડાભી વિરુદ્ધ ફરિયાદ
• શંકર ભગવાનના મંદિર પાસે જામી માથાકૂટ - રાજુભાઈ બારૈયા પર લાકડાના ધોકા વડે હુમલો

ઘોઘા તાલુકાના નેસવડ ગામે હાથઉછીના લીધેલા પૈસા પરત માંગવા બાબતે થયેલી જૂની માથાકૂટમાં પિતા-પુત્ર પર હુમલાની ઘટના સામે આવી છે. દીકરા સાથે ચાલી રહેલા ઝઘડામાં પિતા બચાવ કરવા વચ્ચે પડતા તેમના પર લાકડાના ધોકા અને ઢીકાપાટુ વડે હુમલો કરવામાં આવ્યો હતો. આ મામલે વરતેજ પોલીસે ગામના જ બે શખસો વિરુદ્ધ ગંભીર કલમો હેઠળ ગુનો નોંધી કાયદેસરની કાર્યવાહી હાથ ધરી છે.

નેસવડ ગામના વાડી વિસ્તારમાં રહીને ખેતીકામ કરતા ૫૦ વર્ષીય રાજુભાઈ મેઘાભાઈ બારૈયાએ નોંધાવેલી ફરિયાદ મુજબ, તેમનો દીકરો યોગેશ ગામના શંકર ભગવાનના મંદિર પાસે ઉભો હતો. આ સમયે ગામના જ ભાવેશ બટુકભાઈ ડાભીએ અગાઉ હાથઉછીના આપેલા પૈસાની ઉઘરાણી બાબતે યોગેશ સાથે ઝઘડો શરૂ કર્યો હતો. હીરાના કારખાનાના હિસાબના પૈસા મુદ્દે વાતચીત ઉગ્ર બનતા રાજુભાઈ વચ્ચે પડ્યા હતા. રાજુભાઈએ ગાળો આપવાની ના પાડતા ભાવેશ ઉશ્કેરાઈ ગયો હતો અને લાકડાના ધોકા વડે રાજુભાઈના પગ પર આડેધડ ઘા ઝીંક્યા હતા.

આ દરમિયાન આરોપીનો ભાઈ નરેશ ઉર્ફે ટકો બટુકભાઈ ડાભી પણ મોટરસાયકલ પર ત્યાં ધસી આવ્યો હતો અને રાજુભાઈને ઢીકાપાટુનો માર માર્યો હતો. હુમલો કર્યા બાદ બંને શખસોએ ધમકી આપી હતી કે, "જો હવે ફરીથી પૈસા માંગશો તો જાનથી મારી નાખીશું." ઇજાગ્રસ્ત રાજુભાઈને તાત્કાલિક સારવાર અર્થે હોસ્પિટલ ખસેડવામાં આવ્યા છે. વરતેજ પોલીસે આ મામલે ભાવેશ અને નરેશ ડાભી વિરુદ્ધ BNS કલમ ૧૧૫(૨), ૩૫૨, ૩૫૧(૩), ૫૪ અને જીપી એક્ટ ૧૩૫ મુજબ ગુનો નોંધી બંનેની ધરપકડ કરવા માટે ચક્રો ગતિમાન કર્યા છે.