સિટી ન્યુઝ @ નવી દિલ્હી

વોટ્સએપે પોતાની પ્રાઈવસી પોલિસીમાં મોટો ફેરફાર કરતા 'યુઝરનેમ' ફીચર લોન્ચ કરવાની જાહેરાત કરી છે. અત્યાર સુધી કોઈપણ વ્યક્તિ સાથે ચેટ શરૂ કરવા માટે મોબાઈલ નંબર શેર કરવો અનિવાર્ય હતો, પરંતુ હવે યુઝર્સ માત્ર યુઝરનેમ દ્વારા એકબીજા સાથે જોડાઈ શકશે. આ નવી સુવિધાથી ખાસ કરીને નેટવર્કિંગ કે અજાણ્યા લોકો સાથે વાત કરતી વખતે વ્યક્તિગત મોબાઈલ નંબર સુરક્ષિત રહેશે અને વપરાશકર્તાની પ્રાઈવસીમાં વધારો થશે. કંપનીએ 29 જૂનથી આ ફીચરનું રિઝર્વેશન શરૂ કરી દીધું છે.

આ ફીચર હેઠળ યુઝર્સ 3 થી 35 કેરેક્ટરનું યુનિક યુઝરનેમ બનાવી શકશે, જેમાં અક્ષરો અને અંકોનો ઉપયોગ કરી શકાય છે. વોટ્સએપે વધુ સુરક્ષા માટે 'યુઝરનેમ કી' નામનું વૈકલ્પિક ફીચર પણ આપ્યું છે, જેથી કોઈ અજાણી વ્યક્તિ મેસેજ મોકલે ત્યારે આ કી દ્વારા સ્પામ મેસેજ અટકાવી શકાય. જોકે, વોટ્સએપ વાપરવા માટે મોબાઈલ નંબરની જરૂરિયાત પહેલાની જેમ જ રહેશે, પરંતુ નવા કોન્ટેક્ટ્સ માટે આ યુઝરનેમ એક સુરક્ષિત વિકલ્પ બની રહેશે. જૂની ચેટ્સ કે કોન્ટેક્ટ્સ પર તેની કોઈ અસર થશે નહીં.

વોટ્સએપ દ્વારા આ ફીચર તબક્કાવાર રીતે વિશ્વભરના યુઝર્સ માટે રોલ આઉટ કરવામાં આવશે. મોટી હસ્તીઓ અને બિઝનેસ એકાઉન્ટ્સ માટે તેમની ઓળખ સુરક્ષિત રાખવા ખાસ વ્યવસ્થા કરવામાં આવી છે. આ ફીચરનો સૌથી મોટો ફાયદો એ છે કે હવે કોઈ પણ અજાણી વ્યક્તિને તમારો નંબર જાણ્યા વગર મેસેજ મોકલી શકશે નહીં, કારણ કે વોટ્સએપ કોઈ પણ પ્રકારની સાર્વજનિક ડાયરેક્ટરી બનાવતું નથી. આ સુવિધા આવવાથી સોશિયલ મીડિયા પર પોતાની ઓળખ વધુ સુરક્ષિત અને પ્રોફેશનલ બનાવવી સરળ બનશે.

પ્રાઈવસી વધારતું સુરક્ષા કવચ

વોટ્સએપના આ યુઝરનેમ ફીચરનો મુખ્ય ઉદ્દેશ્ય ડિજિટલ પ્રાઈવસીને વધુ મજબૂત કરવાનો છે. મોબાઈલ નંબર એ વ્યક્તિગત માહિતીનો મહત્વનો હિસ્સો છે, જે હવે અજાણ્યા લોકોથી સુરક્ષિત રહેશે. ખાસ કરીને બિઝનેસ અને નેટવર્કિંગના ક્ષેત્રમાં કામ કરતા લોકો માટે આ એક ખૂબ જ ઉપયોગી સુવિધા સાબિત થશે. સ્પામ મેસેજ પર નિયંત્રણ લાવવા અને અનિચ્છનીય સંપર્કોથી બચવા માટે યુઝરનેમ અને યુઝરનેમ કીનું જોડાણ એક સુરક્ષા કવચ તરીકે કામ કરશે.