• ખોડિયાર માતાના મંદિરે સેંકડો લોકો એકઠા થયા – ભાજપ, કોંગ્રેસ અને AAP સામે સામૂહિક આક્રોશ
• હંમેશા ભાજપ સાથે રહેતા વિસ્તારની જ અવગણના – મહિલાઓ સહિત 100 થી વધુ લોકોએ ઉચ્ચાર્યું વેર
• કોઈ પણ પક્ષે અડાજણના સ્થાનિક ચહેરાને ટિકિટ ન આપતા વિવાદ – ચૂંટણી ટાણે જ 'ડેમેજ કંટ્રોલ' ની કસોટી

સુરત મહાનગરપાલિકાની ચૂંટણીના જંગમાં હવે જનતાએ સીધું મેદાન સંભાળ્યું છે. શહેરના ભાજપના ગઢ ગણાતા અડાજણ વિસ્તારમાં ઉમેદવારની પસંદગીને લઈને જબરદસ્ત જનાક્રોશ ફાટી નીકળ્યો છે. આ વિસ્તારના સ્થાનિકોનો આક્ષેપ છે કે ભાજપ, કોંગ્રેસ કે આમ આદમી પાર્ટી – કોઈ પણ પક્ષે અડાજણના પાયાના કાર્યકર કે વતનીને ટિકિટ આપી નથી. આ અન્યાય સામે આજે અડાજણના લોકોએ એકઠા થઈને આગામી ચૂંટણીમાં મતદાનનો બહિષ્કાર કરવાની ગંભીર ચીમકી આપી છે.

આજે બપોરે ખોડિયાર માતાના મંદિર પાસે અડાજણ વિસ્તારના રહીશો મોટી સંખ્યામાં ભેગા થયા હતા. તેમનું કહેવું છે કે, "આ વિસ્તાર હંમેશા ભાજપ સાથે રહ્યો છે, તેમ છતાં ભાજપે પણ અડાજણના ઉમેદવારની બાદબાકી કરી છે." રાત્રે આ વિરોધ વધુ ઉગ્ર બન્યો હતો જ્યારે મહિલાઓ સહિત 100 થી વધુ લોકોએ રસ્તા પર ઉતરી આવીને સૂત્રોચ્ચાર કર્યા હતા. લોકોએ સ્પષ્ટ શબ્દોમાં કહ્યું છે કે, "ઉમેદવાર નથી તો વોટ પણ નહીં."

અડાજણ વિસ્તારના રહીશોમાં એવી લાગણી પ્રબળ બની છે કે રાજકીય પક્ષો માત્ર મત મેળવવા માટે જ આ વિસ્તારનો ઉપયોગ કરે છે, પરંતુ જ્યારે પ્રતિનિધિત્વ આપવાની વાત આવે ત્યારે સ્થાનિકોની અવગણના કરવામાં આવે છે. આ સામુહિક વિરોધને કારણે હવે રાજકીય આલમમાં હડકંપ મચી ગયો છે. ખાસ કરીને ભાજપ માટે આ ગઢ સાચવવો હવે પડકારજનક બન્યો છે કારણ કે પક્ષના વફાદાર મતદારો જ હવે નારાજ થયા છે.

રાજકોટમાં પણ જ્યારે ટિકિટ વહેંચણી બાદ આંતરિક ખેંચતાણ ચાલી રહી છે, ત્યારે સુરતના અડાજણનો આ જનવિદ્રોહ અન્ય શહેરો માટે પણ લાલબત્તી સમાન છે. જો રાજકીય પક્ષો સમયસર ડેમેજ કંટ્રોલ નહીં કરે અને સ્થાનિકોની લાગણીને નહીં સમજે, તો મતદાનના દિવસે મતપેટીઓ ખાલી રહેવાની પૂરેપૂરી સંભાવના છે. હવે સૌની નજર પક્ષોના આગામી પગલાં પર છે કે તેઓ નારાજ અડાજણવાસીઓને કેવી રીતે મનાવે છે.