• બાતમી આપનારને ₹20,000 સુધીનું રોકડ ઈનામ - રાજકોટ રેન્જ IG એ ગુનેગારો સામે સકંજો કસ્યો
• જામનગર, મોરબી અને સુરેન્દ્રનગર સહિતના જિલ્લાઓમાં પોલીસ એક્શન મોડમાં - બાતમીદારનું નામ ગુપ્ત રખાશે
• ગંભીર ગુના આચરી નાસતા ફરતા તત્વોની હવે ઉંઘ હરામ - કોર્ટ વોરંટ બાદ હવે ઈનામી જાહેરાતનો દાવ

રાજકોટ રેન્જ આઈ.જી. તરીકેનો પદભાર સંભાળતાની સાથે જ બાહોશ અધિકારી નિર્લિપ્ત રાયે ગુનેગારો વિરુદ્ધ યુદ્ધ છેડી દીધું છે. સૌરાષ્ટ્રના પાંચ જિલ્લાઓમાં ગંભીર ગુનાઓ આચરીને લાંબા સમયથી નાસતા ફરતા 29 આરોપીઓને ઝડપી પાડવા માટે પોલીસે હવે જનતાનો સાથ માંગ્યો છે. આ આરોપીઓની સચોટ બાતમી આપનાર માટે રેન્જ આઈ.જી. દ્વારા આકર્ષક રોકડ ઈનામોની જાહેરાત કરવામાં આવી છે.

5 જિલ્લાના 'મોસ્ટ વોન્ટેડ' પોલીસના રડારમાં રાજકોટ રેન્જ હસ્તક આવતા રાજકોટ ગ્રામ્ય, જામનગર, મોરબી, સુરેન્દ્રનગર અને દેવભૂમિ દ્વારકા જિલ્લામાં ખૂન, લૂંટ અને અન્ય ગંભીર ગુનાઓમાં સંડોવાયેલા 29 આરોપીઓ હજુ પણ પોલીસ પકડથી દૂર છે. આ આરોપીઓ વિરુદ્ધ કોર્ટમાંથી ધરપકડ વોરંટ પણ મેળવવામાં આવ્યા છે, પરંતુ તેઓ પોલીસને થાપ આપી રહ્યા છે. હવે આ ગુનેગારોને જેલના સળિયા પાછળ ધકેલવા માટે નિર્લિપ્ત રાયે સીધો એક્શન પ્લાન તૈયાર કર્યો છે.

ઈનામ અને સુરક્ષાની ખાતરી પોલીસ યાદી મુજબ, જે નાગરિક આ ફરાર આરોપીઓ અંગે સચોટ માહિતી આપશે, તેને આરોપીની પ્રોફાઇલ મુજબ ₹5000 થી લઈને ₹20,000 સુધીનું રોકડ ઈનામ સ્થળ પર જ આપવામાં આવશે. સૌથી મહત્વની વાત એ છે કે, માહિતી આપનાર વ્યક્તિની સુરક્ષાને ધ્યાને રાખીને તેનું નામ અને ઓળખ સંપૂર્ણપણે ગુપ્ત રાખવામાં આવશે.

ગુનેગારોમાં ફફડાટ નિર્લિપ્ત રાયની છાપ એક કડક અને નીડર અધિકારી તરીકેની છે. તેમની આ જાહેરાત બાદ અંડરવર્લ્ડ અને સ્થાનિક ગુનેગારોમાં ફફડાટ વ્યાપી ગયો છે. જો કોઈ નાગરિક પાસે આ 29 આરોપીઓ પૈકી કોઈની પણ હિલચાલ અંગે માહિતી હોય, તો તેઓ તુરંત રાજકોટ રેન્જ કચેરી અથવા સંબંધિત જિલ્લા પોલીસનો સંપર્ક કરી શકે છે.

આગામી દિવસોમાં આ 29 આરોપીઓ પૈકી કેટલા ઝબ્બે થાય છે તેના પર સૌની નજર રહેશે, પરંતુ નિર્લિપ્ત રાયના આ આક્રમક અભિગમે સ્પષ્ટ કરી દીધું છે કે હવે રાજકોટ રેન્જમાં ગુનેગારો માટે કોઈ સુરક્ષિત આશરો બચ્યો નથી.