સિટી ન્યુઝ @ રાજકોટ

'સ્વચ્છતા હી સેવા-૨૦૨૬' અંતર્ગત રાજકોટ શહેરમાં વિઝિબલ ક્લીનેનેસ (Visible Cleanliness) ઉત્તમ રીતે જળવાઈ રહે, જાહેર સ્થળો અને મુખ્ય માર્ગો સ્વચ્છ તેમજ આકર્ષક દેખાય, ક્લીનેનેસ ટાર્ગેટ યુનિટ (CTU) નાબૂદ થાય તથા શહેરની જાહેર સ્વચ્છતા વધુ સુદૃઢ બને તેવા ઉમદા હેતુથી રાજકોટ મહાનગરપાલિકા દ્વારા શહેરના તમામ મુખ્ય માર્ગો પર સઘન સફાઈ ઝુંબેશનો પ્રારંભ કરવામાં આવ્યો છે.

આ મહત્વપૂર્ણ કામગીરી અંતર્ગત શહેરના તમામ વોર્ડના મુખ્ય માર્ગો પર નિયમિત સફાઈ કામગીરી સુનિશ્ચિત કરવા માટે રાજકોટ મહાનગરપાલિકાના જવાબદાર અધિકારીઓ અને કર્મચારીઓની વિશેષ ટીમો બનાવવામાં આવી છે. આ સમર્પિત ટીમો દ્વારા સંબંધિત મુખ્ય માર્ગોનું સતત તેમજ દૈનિક ધોરણે મોનિટરિંગ કરવામાં આવશે અને સ્વચ્છતા હંમેશા જળવાઈ રહે તે માટે જરૂરી તમામ વહીવટી કાર્યવાહી હાથ ધરવામાં આવશે.

જાહેરમાં ગંદકી ફેલાવનાર, જાહેરમાં કચરો ફેંકનાર, ન્યુસન્સ સર્જનાર તથા સ્વચ્છતા અંગેના સરકારી નિયમોનો ભંગ કરનાર બેજવાબદાર આસામીઓ સામે વહીવટી તંત્ર દ્વારા કડક કાર્યવાહી કરીને દંડરૂપી વહીવટી ચાર્જ વસૂલવામાં આવશે. આ સાથે જ પાનની દુકાનો દ્વારા ઉપયોગમાં લેવાતા પ્રતિબંધિત પાનપીસ અને ગુટખાના અવશેષો સામે પણ કડક કાર્યવાહી કરાશે. આ ઉપરાંત મુખ્ય માર્ગો પર આવેલા પે એન્ડ યુઝ ટોઈલેટની ચકાસણી, હંગામી દબાણો દૂર કરવાની કામગીરી, ફૂટપાથની મરામત તેમજ રોડ પર રહેલી ધૂળ, માટી, પથ્થર અને ઘાસ-ઝાડી દૂર કરવાની આનુષંગિક કામગીરી પણ સઘનપણે કરવામાં આવશે.

મહાનગરપાલિકા દ્વારા શહેરના મુખ્ય માર્ગો પર માત્ર સફાઈ કરવી એટલો જ નહીં, પરંતુ "સફાઈ માત્ર કરવી નહીં, પરંતુ સફાઈ કાયમ માટે જાળવી રાખવી" ના સ્પષ્ટ અભિગમ સાથે કામગીરી કરવામાં આવશે. શહેરના મુખ્ય માર્ગો હંમેશા સ્વચ્છ, સુઘડ અને સુંદર રહે તેમજ રાજકોટના નાગરિકોને એક સ્વચ્છ અને સુવ્યવસ્થિત જાહેર પરિસર મળી રહે તે માટે તમામ સંબંધિત ટીમો દ્વારા અવિરત અને સતત કામગીરી જારી રાખવામાં આવશે.

શહેરી વિસ્તારોમાં સ્વચ્છતા અને આરોગ્યની જાળવણી એ તંત્ર અને નાગરિકો બંનેની સંયુક્ત જવાબદારી છે, ત્યારે મનપા દ્વારા લેવાયેલા આ પગલાં રાજકોટને વધુ સ્વચ્છ અને ગૌરવવંતુ બનાવવામાં અત્યંત સહાયક સાબિત થશે.

શહેર સ્વચ્છતા અને જનજાગૃતિ

શહેરના મુખ્ય માર્ગો અને જાહેર સ્થળોની સફાઈ જાળવવી એ નાગરિકોના આરોગ્ય અને સ્વસ્થ સમાજ માટે અનિવાર્ય છે.