• "વોર્ડ-7 માં સવારનો મૂરતિયો બપોરે બદલાયો", ભાજપે બ્રહ્મ સમાજની નારાજગી ઠારી?
• વોર્ડ-11 માં રક્ષિત કલોલાની ટિકિટ યથાવત – 1.5 કલાકની ગડમથલ બાદ પક્ષે લીધો મોટો નિર્ણય.
• ડો. માધવ દવેનો જીતનો વિશ્વાસ – નારાજ નેતાઓને સાંભળવાની જવાબદારી મારી છે.

રાજકોટ મહાનગરપાલિકાની ચૂંટણીમાં ઉમેદવારી ફોર્મ ભરવાના અંતિમ દિવસે ભાજપમાં અભૂતપૂર્વ ડ્રામા જોવા મળ્યો છે. સવારે રેસકોર્સ ખાતે યોજાયેલા 'વિજય વિશ્વાસ સંમેલન' માં જે શૈલેષ જાની ઉમેદવાર તરીકે સ્ટેજ પર બિરાજમાન હતા, બપોર સુધીમાં તો તેમનું પત્તું કપાઈ ગયું હતું! ભાજપે છેલ્લી ઘડીએ રણનીતિ બદલીને બ્રહ્મ સમાજના અગ્રણી અને પૂર્વ કોર્પોરેટર ડો. નેહલ શુક્લને વોર્ડ-7 માંથી મેદાનમાં ઉતાર્યા છે. આ ફેરબદલને પગલે રાજકીય વર્તુળોમાં અનેક તર્કવિતર્કો શરૂ થયા છે.

વોર્ડ-11 માં પણ રક્ષિત કલોલાની ટિકિટને લઈને દોઢ કલાક સુધી સસ્પેન્સ રહ્યું હતું, પરંતુ અંતે પક્ષે તેમના પર ભરોસો જાળવી રાખ્યો છે. શહેર ભાજપ પ્રમુખ ડો. માધવ દવેએ તમામ 72 બેઠકો જીતવાનો વિશ્વાસ વ્યક્ત કર્યો છે, પરંતુ પક્ષમાં અંદરખાને વ્યાપેલો અસંતોષ જગજાહેર છે. ગઈકાલે રાત્રે વોર્ડ-3, 13 અને 14 ના કાર્યકરોએ 'કમલમ' ખાતે કરેલા હોબાળાને કારણે પોલીસ બોલાવવી પડી હતી, જે ભાજપ જેવી શિસ્તબદ્ધ પાર્ટી માટે આંચકા સમાન ઘટના છે.

ધારાસભ્યોનું લોબિંગ અને દિગ્ગજોની વિદાય: આ વખતે ટિકિટ ફાળવણીમાં પક્ષે 'નો-રિપીટ' થીયરીનો કડક અમલ કર્યો છે, જેમાં પૂર્વ મેયર નયનાબેન પેઢડિયા અને પૂર્વ સ્ટેન્ડિંગ ચેરમેન જયમીન ઠાકર જેવા મહારથીઓને ઘરે બેસાડી દેવાયા છે. કાર્યકરોમાં એવી પણ ચર્ચા છે કે ઉમેદવારો નક્કી કરવામાં શહેરના એક મહિલા ધારાસભ્યનું પલડું ભારે રહ્યું છે. હવે જોવાનું એ રહેશે કે આ આંતરિક ખેંચતાણ અને છેલ્લી ઘડીના ફેરફારો ભાજપના 'મિશન 72' માં વિઘ્ન બને છે કે કેમ.

રાજકોટના જાગૃત મતદારો આ વખતે પક્ષના આ નવા પ્રયોગને કેવો પ્રતિસાદ આપે છે તેના પર સૌની નજર છે. ફોર્મ ભરવાની પ્રક્રિયા પૂર્ણ થતા જ આજથી ભાજપના કાર્યકરો બૂથ લેવલે પ્રચારમાં જોતરાઈ જશે.

રાજકોટ ભાજપ: કોણ ઇન, કોણ આઉટ?